அஸ்வின் முழுநிறைவான பந்துவீச்சாளரானார்: சச்சின் புகழாரம்

வங்கதேசத்துக்கு எதிரான ஒரு டெஸ்ட் போட்டி, பிறகு ஆஸ்திரேலியாவுக்கு எதிரான கடினமான 4 டெஸ்ட் போட்டிகள் கொண்ட தொடர்களை முன்னிட்டு அஸ்வின் மிக முக்கியமான பவுலர் என்று கூறுகிறார் சச்சின் டெண்டுல்கர்.

இது குறித்து சச்சின் கூறியதாவது:

கடந்த 2 ஆண்டுகளில் அஸ்வின் ஒரு பவுலராக முற்றிலும் மாறியுள்ளார். அவர் ஒரு முழுநிறைவான பந்து வீச்சாளராக உருப்பெற்றுள்ளார்.

சூழ்நிலையைக் கட்டுக்குள் வைத்திருப்பதிலும் ஒரு குறிப்பிட்ட ஸ்பெல்லை எப்படி அணுக வேண்டு என்பதிலும் அவர் முழுநிறைவான பவுலராக மாற்றமடைந்துள்ளார்.

முன்னதாக அவர் தன் பந்து வீச்சில் நிறைய பரிசோதனைகளை செய்கிறார் என்று நான் கருதினேன். ஆனால் இப்போது முதிர்ச்சியான ஒரு ஆஃப் ஸ்பின்னராக வளர்ந்துள்ளார் அஸ்வின்.

வெளிநாடுகளில் அவர் இந்திய அணியை வெற்றி பெறச் செய்வதை பார்க்கும் ஆவலுடன் காத்திருக்கிறோம், அவர் இப்போது வீசுவதைப் பார்த்தால் அவரால் அதனையும் சாதிக்க முடியும் என்றே நான் நம்புகிறேன்.

இவ்வாறு கூறியுள்ளார் சச்சின் டெண்டுல்கர்.