ஐஎஸ்எல்: டெல்லி-புணே ஆட்டம் டிரா

இந்தியன் சூப்பர் லீக் (ஐஎஸ்எல்) கால்பந்து போட்டியில் டெல்லியில் நேற்று நடைபெற்ற புணே சிட்டி-டெல்லி டைனமோஸ் அணிகளுக்கு இடையிலான ஆட்டம் கோலின்றி டிராவில் முடிந்தது. டெல்லி ஜவஹர்லால் நேரு மைதானத்தில் நடைபெற்ற இந்த ஆட்டத்தைக் காண பெருமளவு ரசிகர்கள் படையெடுத்தனர். இதனால் 60 ஆயிரம் பேர் அமரும் வசதி கொண்ட இந்த மைதானம் நிரம்பி வழிந்தது.

ஆனால் போட்டி கோலின்றி டிராவில் முடிந்தது ரசிகர்களுக்கு ஏமாற்றமாக அமைந்தது. எனினும் இரு அணிகளும் அபாரமாக ஆடியதால் ஆட்டம் விறுவிறுப்பாகவே சென்றது.

சென்னை-கோவா இன்று மோதல்

மார்கோவாவில் இன்று நடைபெறும் ஆட்டத்தில் சென்னையின் எப்.சி. அணியும், கோவா எப்.சி. அணியும் மோதுகின்றன. சென்னை அணி மார்கோ மெட்டாரஸி, மிகைல் சில்வர்ஸ்டெர் என பலம் வாய்ந்த வீரர்களைக் கொண்டுள்ளது. இவர்களில் மெட்டாரஸி உலகக் கோப்பையை வென்ற இத்தாலி அணியில் இடம்பெற்றிருந்தவர். சில்வர்ஸ்டெர் மான்செஸ்டர் யுனைடெட் அணியின் முன்னணி பின்கள வீரராக இருந்தவர்.