இறுதிப் போட்டியில் வென்றிருக்கா விட்டால் துரதிர்ஷ்டம்தான்: தினேஷ் கார்த்திக்

வங்கதேசத்துக்கு அதிர்ச்சியூட்டிய அதிரடியில் கடைசி பந்தை ஆஃப் திசையில் சிக்ஸ் அடித்து தினேஷ் கார்த்திக் தனது இத்தனை நாள் கடினமான பயிற்சிகளுக்கு வெற்றி மூலம் நியாயம் செய்தார்.

இந்நிலையில் ஆட்ட நாயகனாகத் தேர்வு செய்யப்பட்ட அவர் ரசிகர்களின் ஆரவாரத்துக்கு இடையே பரிசளிப்பு நிகழ்ச்சியில் கூறியதாவது:

இப்படி ஆடியது மிகவும் மகிழ்ச்சியளிக்கிறது. அணிக்காக மகிழ்ச்சியடைகிறேன். இந்தத் தொடரில் நாங்கள் உள்ளபடியே நன்றாக விளையாடினோம். ஆகவே இறுதிப்போட்டியில் வெல்லாமல் போயிருந்தால் அது துரதிர்ஷ்டம்தான்.

பேட்டிங் அங்கு சுலபமாக இல்லை. அதுவும் முஸ்தபிசுர் வீசிய விதம்...எனவே நான் இறங்கி நன்றாக அடித்து ஆட வேண்டிய நிலை. நான் கடுமையாகப் பயிற்சி எடுத்துக் கொண்டேன், அதாவது பந்து வரும் திசையிலேயே அடிப்பதற்கான அடிப்படைகளை மேற்கொண்டு வந்தேன். அதிர்ஷ்டவசமாக இன்று கைகொடுத்தது.

வாய்ப்பு கிடைக்க கடினமான ஒரு அணி இந்திய அணி, ஆனால் ஒருமுறை பெற்ற வாய்ப்பை விட்டுவிடக்கூடாது, பின்னணியிலிருந்தவர்களுக்கு நன்றி. அவர்கள் எனக்கு எப்பவும் ஆதரவாகவே இருந்திருக்கின்றனர், உண்மையில் மகிழ்ச்சியாக உள்ளது.