ஆசிய கோப்பை கூடைப்பந்து தகுதி சுற்று: கத்தார், கஜகஸ்தானுடன் இந்தியா பலப்பரீட்சை

சென்னை: எஃப்​ஐபிஏ ஆசிய கோப்பை கூடைப்​பந்து போட்டி வரும் 2025-ம் ஆண்டு சவுதி அரேபி​யா​வில் நடைபெற உள்ளது. இந்த தொடரில் மொத்தம் 16 அணிகள் கலந்து கொண்டு விளையாட உள்ளன. போட்​டியை நடத்​தும் சவுதி அரேபியா நேரடியாக தகுதி பெற்ற நிலை​யில் மற்ற அணிகளை தேர்வு செய்​வதற்கு தகுதி சுற்று போட்​டிகள் நடத்​தப்​பட்டு வருகின்றன. தகுதி சுற்றில் 24 நாடுகள் பங்கேற்றுள்ளன.

இவை 6 பிரி​களாக பிரிக்​கப்​பட்டு ஒவ்வொரு பிரி​விலும் 4 அணிகள் இடம் பெற்றுள்ளன. இதில் இந்திய அணி ‘ஏ’ பிரி​வில் இடம் பெற்றுள்​ளது. முதல்​கட்ட தகுதி சுற்றில் இந்திய அணி ஈரானிடம் 86-53 என்ற கணக்​கிலும் கஜகஸ்​தானிடம் 50-63 என்ற கணக்​கிலும் தோல்வி அடைந்​திருந்​தது.

இந்நிலை​யில் இரண்​டாம் கட்ட தகுதிச்​சுற்று போட்டி சென்னை நேரு உள் விளை​யாட்டு அரங்கில் வரும் 22 மற்றும் 25-ம் தேதி நடைபெறுகிறது. இதில் 22-ம் தேதி நடைபெறும் ஆட்டத்​தில் கத்தா​ருட​னும், 25-ம் தேதி நடைபெறும் ஆட்டத்​தில் கஜகஸ்​தானுடனும் இந்திய அணி பலப்​பரீட்சை நடத்து​கிறது. இந்த இரு போட்​டி​யிலும் பங்கேற்​கும் இந்திய அணிக்கு தமிழகத்​தைச் சேர்ந்த முயின் பெக் ஹபீஸ் கேப்​டனாக செயல்பட உள்ளார்.

அவருடன் தமிழகத்​தைச் சேர்ந்த பாலதனேஷ்வர் பொய்​யாமொழி, அரவிந்த் குமார் முத்து கிருஷ்ணன், பிரசாந்த் சிங் ராவத், பிரணவ் பிரின்ஸ் ஆகியோ​ரும் அணியில் உள்ளனர். மாலை 6 மணிக்கு நடைபெறும் இந்த போட்​டியை ரசிகர்கள் இலவசமாக கண்டு​களிக்​கலாம் என போட்டி அமைப்​பாளர்கள் தெரி​வித்​துள்ளனர். இந்த தகுதி சுற்று போட்​டிகளை சர்வதேச கூடைப்​பந்து சம்மேளனம் (எஃப்​ஐபிஏ) இந்திய கூடைப்​பந்து சம்மேளனம், தமிழ்​நாடு கூடைப்​பந்து சங்கம் ஆகியவை இணைந்து நடத்து​கின்றன. 15 ஆண்டுக்​குப் பிறகு தற் போது​தான் சென்னை​யில் சர்வதேச கூடைப்​பந்து போட்டி நடைபெற உள்ளது. கடைசியாக 2009-ம் ஆண்டு எஃப்​ஐபிஏ மகளிர் ஆசிய கோப்பை போட்டி நடைபெற்றிருந்​தது.

இந்திய அணி விவரம்: முயின் பெக் ஹபீஸ் (கேப்​டன்), பாலதனேஷ்வர் பொய்​யாமொழி, அரவிந்த் குமார் முத்து கிருஷ்ணன், பிரசாந்த் சிங் ராவத், பிரணவ் பிரின்ஸ், அம்​ஜியோத் சிங், சஹாய்ஜ் பிர​தாப் சிங் சேகோன், கன்​வர் குர்​பாஸ் சிங் சாந்து, ஹர்ஷ் ​தாகர், குஷால் சிங், பல்​பிரீத் சிங் பிரார், பிரின்​சிபல்​ சிங்​.