தேசிய சீனியர் ஹாக்கி சாம்பியன்ஷிப் போட்டி: தமிழ்நாடு - ம.பி. ஆட்டம் டிரா

சென்னை: ஆடவருக்கான 14-வது தேசிய சீனியர் ஹாக்கி சாம்பியன்ஷிப் போட்டி சென்னை எழும்பூரில் உள்ள மேயர் ராதாகிருஷ்ணன் விளையாட்டரங்கில் நடைபெற்று வருகிறது. இதில் ‘சி’ பிரிவில் இடம் பெற்றுள்ள தமிழ்நாடு அணி தனது 2-வது லீக் ஆட்டத்தில் நேற்று மத்திய பிரதேசத்துடன் மோதியது.

இந்த ஆட்டம் 2-2 என்ற கோல் கணக்கில் டிராவில் முடிவடைந்தது. தமிழ்நாடு அணி தரப்பில் செல்வராஜ் கனகராஜ் (42-வது நிமிடம்), சண்முகவேல் (53-வது நிமிடம்) ஆகியோர் தலா ஒரு கோல் அடித்தனர். மத்திய பிரதேச அணி சார்பில் குமார் கனோஜியா (35-வது நிமிடம்), அக்சய் துபே (42-வது நிமிடம்) ஆகியோர் தலா ஒரு கோல் அடித்தனர்.

மற்ற ஆட்டங்களில் டெல்லி 6-0 என்ற கோல் கணக்கில் ஜம்மு-காஷ்மீர் அணியையும், கர்நாடகா 5-1 என்ற கோல் கணக்கில் சண்டீகரையும், பெங்கால் 10-0 என்ற கோல் கணக்கில் அசாம் அணியையும், ஆந்திரா 13-0 என்ற கோல் கணக்கில் அந்தமான் மற்றும் நிக்கோபார் அணியையும் வீழ்த்தின.