சன்ரைசர்ஸை வீழ்த்திய சூர்யகுமார் யாதவ்: மும்பை அணி அபார வெற்றி @ ஐபிஎல்

மும்பை: சூர்யகுமார் யாதவ்வின் அபார ஆட்டத்தால் சன்ரைசர்ஸ் அணியை வீழ்த்தி மும்பை இந்தியன்ஸ் அணி வெற்றிபெற்றது.

174 ரன்கள் இலக்கை துரத்திய மும்பை அணிக்கு தொடக்கம் சரியாக அமையவில்லை. 31 ரன்கள் எடுப்பதற்குள்ளாகவே 3 விக்கெட்களை இழந்து தடுமாறியது. இஷான் கிஷன் 9 ரன்கள், ரோஹித் யாதவ் 4 ரன்கள், நமன் திர் பூஜ்ஜியம் என அடுத்தடுத்து விக்கெட்களை இழந்தனர். இதன்பின் ஜோடி சேர்ந்த சூர்யகுமார் யாதவ் - திலக் வர்மா 31 ரன்களில் 174 ரன்கள் இலக்கை நோக்கி அழைத்துச் சென்றனர்.

திலக் வர்மா கிடைக்கிற பந்துகளை மட்டும் விளையாடி பொறுமை காக்க மறுபுறம் இருந்த சூர்யகுமார் யாதவ் அதிரடியை கையாண்டார். சன்ரைசர்ஸ் அணி பவுலர்களை யாரையும் விட்டுவைக்காத அவர், பவுண்டரிகளையும் சிக்ஸர்களையும் விளாசி 51 பந்துகளில் சதம் அடித்தார். அவரின் சதத்துடன் மும்பை அணி வெற்றிபெற்றது. திலக் வர்மா 37 ரன்கள் எடுத்தார்.

சன்ரைசர்ஸ் இன்னிங்ஸ்: டாஸ் வென்ற மும்பை சேஸிங்கை தேர்வு செய்தது. அதன்படி ஓப்பனர்களாக களமிறங்கிய டிராவிஸ் ஹெட் சிறப்பாக ஆடி தொடங்கிவைத்தார். அபிஷேக் சர்மா அவருக்கு உறுதுணையாக இருக்க முயன்றார். ஆனால், அதனை நீடிக்க விடாமல் 11 ரன்களில் அபிஷேக்கை வெளியேற்றினார் பும்ரா. அடுத்து வந்த மயங்க் அகர்வால் 5 ரன்களில் போல்டாக்கப்பட்டு கிளம்பினார்.

பொறுப்பாக விளையாடி ரன் சேர்த்த டிராவிஸ் ஹெட் 48 ரன்களில் அவுட்டானது ரசிகர்களுக்கு ஏமாற்றம். நிதிஷ் ரெட்டி 20 ரன்கள், ஹென்ரிச் கிளாசன் 2 ரன்கள் என சீரான இடைவெளியில் விக்கெட்டுகள் விழுந்ததால் ஹைதராபாத் தடுமாற்றம் கண்டது. இதனால் 15 ஓவர்கள் முடிவில் 5 விக்கெட்டுகளை பறிகொடுத்து, 120 ரன்களைச் சேர்த்திருந்தது.

16வது ஓவரில் ஷாபாஸ் அகமது 10 ரன்கள், மார்கோ ஜான்சன் 17 ரன்கள் என இரண்டு பேரும் ஒரே ஓவரில் அவுட்டானதும் ஆட்டம் மும்பை கைக்குச் சென்றது. அடுத்த ஓவரில் 3 ரன்களில் அவுட்டான அப்துல் சமத் அதை உறுதிப்படுத்தினார்.

இருந்தாலும் பாட் கம்மின்ஸின் இறுதி அடியால் நிர்ணயிக்கப்பட்ட 20 ஓவர்கள் முடிவில் 8 விக்கெட்டுகளை இழந்த ஹைதராபாத் 173 ரன்களைச் சேர்த்தது. கம்மின்ஸ் 35 ரன்களுடனும், சன்வீர் சிங் 8 ரன்களுடனும் களத்தில் இருந்தனர்.

மும்பை அணி தரப்பில் ஹர்திக் பாண்டியா, பியூஸ் சாவ்லா ஆகியோர் தலா 3 விக்கெட்டுகளையும், பும்ரா, அன்ஷூல் ஆகியோர் தலா 1 விக்கெட்டையும் வீழ்த்தினர்.