ஐசிசி தரவரிசை பட்டியல் வெளியீடு - டி20, ஒருநாள் கிரிக்கெட்டில் இந்திய அணி முதலிடம்

துபாய்: புதுப்பிக்கப்பட்ட வருடாந்திர கிரிக்கெட் தரவரிசை பட்டியலை ஐசிசி வெளியிட்டுள்ளது. இதில் டி20 மற்றும் ஒருநாள் கிரிக்கெட் போட்டிகளில் இந்திய அணி முதலிடத்தை தக்கவைத்துக் கொண்டுள்ளது. அதேவேளையில் டெஸ்ட் போட்டிக்கான தரவரிசையில் முதலிடத்தை ஆஸ்திரேலியாவிடம் இந்திய அணி பறிகொடுத்துள்ளது.

டெஸ்ட் தரவரிசையில் 124 புள்ளிகளுடன் உலக டெஸ்ட் சாம்பியனான ஆஸ்திரேலியா முதலிடத்தை பிடித்துள்ளது. 120 புள்ளிகளுடன் இந்திய அணி 2-வது இடத்தில் உள்ளது. இங்கிலாந்து அணி 105 புள்ளிகளுடன் 3-வது இடத்திலும் தென் ஆப்பிரிக்கா 103 புள்ளிகளுடன் 4-வது இடத்திலும் உள்ளன. 3 முதல் 9-வது இடங்களில் உள்ள அணிகளின் தரவரிசையில் எந்தவித மாற்றமும் இல்லை.

நியூஸிலாந்து (96), பாகிஸ்தான் (89), இலங்கை (83),மேற்கு இந்தியத் தீவுகள் (82), வங்கதேசம் (53) ஆகிய அணிகள் முறையே5 முதல் 9-வது இடங்களில் உள்ளன. ஜிம்பாப்வே, அயர்லாந்து, ஆப்கானிஸ்தான் ஆகிய 3 அணிகளுக்கும் தரவரிசை வழங்கப்படவில்லை. ஏனெனில்இந்த 3 அணிகளும் போதிய அளவிலான டெஸ்ட் போட்டிகளை விளையாடவில்லை. தரவரிசை அட்டவணையில் இடம்பெற வேண்டுமானால் 3 ஆண்டு காலப்பகுதியில் குறைந்தபட்சம் 8 டெஸ்ட் போட்டிகளில் விளையாடி இருக்க வேண்டும்.

ஒருநாள் கிரிக்கெட் போட்டிக்கான தரவரிசையில் இந்திய அணி 122 புள்ளிகளுடன் முதலிடத்தில் உள்ளது. முதல் 10 இடங்களில் எந்தவித மாற்றமும் இல்லை. ஆஸ்திரேலியா (116), தென் ஆப்பிரிக்கா (112), பாகிஸ்தான் (106), நியூஸிலாந்து (101), இங்கிலாந்து (95), இலங்கை (93), வங்கதேசம் (86), ஆப்கானிஸ்தான் (80), மேற்கு இந்தியத் தீவுகள் (69) ஆகிய அணிகள் முறையே 2 முதல் 10-வது இடங்களில் உள்ளன. அயர்லாந்து அணி ஓர் இடம் முன்னேறி 11-வது இடத்தை பிடித்துள்ளது. ஜிம்பாப்வே ஓர் இடத்தை இழந்து 12-வது இடத்தில் உள்ளது.

டி20 தரவரிசையில் இந்திய அணி 264 புள்ளிகளுடன் முதலிடம் வகிக்கிறது. ஆஸ்திரேலியா (257), இங்கிலாந்து (252), தென் ஆப்பிரிக்கா (250), நியூஸிலாந்து (250), மேற்கு இந்தியத் தீவுகள் (249), பாகிஸ்தான் (247), இலங்கை (232), வங்கதேசம் (231), ஆப்கானிஸ்தான் (217) ஆகிய அணிகள் முறையே 2 முதல் 10-வது இடங்களில் உள்ளன.