டெல்லி கேபிடல்ஸுடன் இன்று மோதல்: வெற்றி நெருக்கடியில் மும்பை இந்தியன்ஸ்

புதுடெல்லி: ஐபிஎல் தொடரில் இன்று பிற்பகல் 3.30 அணிக்கு டெல்லி அருண் ஜேட்லி மைதானத்தில் நடைபெறும் ஆட்டத்தில் டெல்லி கேபிடல்ஸ் - மும்பை இந்தியன்ஸ் அணிகள் மோதுகின்றன.

ரிஷப் பந்த் தலைமையிலான டெல்லி கேபிடல்ஸ் அணி 9 ஆட்டங்களில் விளையாடி 4 வெற்றி, 5 தோல்விகளுடன் 8 புள்ளிகள் பெற்று பட்டியலில் 6-வது இடத்தில் உள்ளது. கடைசியாக குஜராத் டைட்டன்ஸ் அணிக்கு எதிரான ஆட்டத்தில் 4 ரன்கள் வித்தியாசத்தில் வெற்றி கண்டிருந்தது. இந்த ஆட்டத்தில் ரிஷப் பந்த்தின் துணிச்சலான மட்டை வீச்சு மற்றும் எழுச்சியூட்டிய அவரது தலைமைப்பண்பு ஆகியவற்றால் டெல்லி கேபிடல்ஸ் வெற்றியை வசப்படுத்தியிருந்தது. இன்றைய ஆட்டத்தில் வெற்றி பெறும் பட்சத்தில் டெல்லி அணி பிளே ஆஃப் சுற்றுக்கு முன்னேறுவதற்கான வாய்ப்பை பலப்படுத்திக் கொள்ளும்.

டெல்லியின் அணியின் பேட்டிங் வரிசையில் ரிஷப் பந்த்துடன், ஜாக் ஃப்ரேசர் மெக்கர்க், டிரிஸ்டன் ஸ்டப்ஸ் ஆகியோரும் தாக்குதல் ஆட்டம் மேற்கொள்பவர்களாக திகழ்கின்றனர். தொடக்க பேட்டிங்கில் பிரித்வி ஷாவிடம் இருந்து கடந்த சில ஆட்டங்களாக சிறந்த திறன் வெளிப்படவில்லை. அவர், மீண்டும் பார்முக்கு திரும்புவதில் கவனம் செலுத்தக்கூடும். ஆல்ரவுண்டரான அக்சர் படேல், குஜராத் அணிக்கு எதிரான ஆட்டத்தில் 43 பந்துகளில் 66 ரன்கள் சேர்த்து அணிக்கு பலம் சேர்த்திருந்தார். அவரிடம் இருந்து மீண்டும் ஒரு சிறந்த மட்டை வீச்சு வெளிப்படக்கூடும். பந்துவீச்சை பொறுத்தவரையில் குல்தீப் யாதவ் தொடர்ச்சியாக சிறந்த திறனை வெளிப்படுத்தி வருகிறார். வேகப்பந்து வீச்சை பொறுத்தவரை அன்ரிச் நோர்க்கியா, கலீல் அகமது, முகேஷ் குமார், இஷாந்த் சர்ம ஆகியோர் முன்னேற்றம் காண்பது அவசியம்.

ஹர்திக் பாண்டியா தலைமையிலான மும்பை இந்தியன்ஸ் அணி 8 ஆட்டங்களில் விளையாடி 3 வெற்றி, 5 தோல்விகளுடன் 6 புள்ளிகள் பெற்று பட்டியலில் 8-வது இடம் வகிக்கிறது. ஹர்திக் பாண்டியாவிடம் இருந்துபெரிய அளவிலான பங்களிப்பு இல்லாதது அணியின் செயல்திறனை வெகுவாக பாதித்துள்ளது. ரோஹித் சர்மா, சூர்யகுமார் யாதவ், திலக் வர்மா ஆகியோரை மட்டுமே பேட்டிங்கில் பெரிதும் அணி நம்பியுள்ளது. டிம் டேவிட், இஷான் கிஷன், ஹர்திக் பாண்டியா ஆகியோர் பேட்டிங்கில் உரிய பங்களிப்பை வழங்கினால் அணியின் பலம் அதிகரிக்கும். இது ஒருபுறம் இருக்க இந்த சீசனில் மும்பை அணியின் பந்து வீச்சு பலவீனமாகி உள்ளது.

13 விக்கெட்கள் கைப்பற்றியுள்ள ஜஸ்பிரீத் பும்ராவை தவிர மற்ற பந்து வீச்சாளர்கள் எந்தவித தாக்கத்தையும் ஏற்படுத்துவது இல்லை. ஜெரால்டு கோட்ஸி 12 விக்கெட்களை கைப்பற்றியுள்ள போதிலும் அவர், ஓவருக்கு 10 ரன்களுக்கு மேல் விட்டுக்கொடுப்பது பாதிப்பை ஏற்படுத்துவதாக உள்ளது. இன்றைய ஆட்டத்தில் வெற்றி பெற்று பிளே ஆஃப் சுற்றுக்கு முன்னேறுவதற்கான வாய்ப்பில் நீடிக்க வேண்டுமானால் மும்பை அணி பேட்டிங் மற்றும் பந்து வீச்சில் மேம்பட்ட திறனை வெளிப்படுத்த வேண்டும்.