சென்னை கிராண்ட் மாஸ்டர்ஸ் செஸ் | 3-வது சுற்றில் அர்ஜுன் எரிகைசி வெற்றி

சென்னை: சென்னை கிராண்ட் மாஸ்டர்ஸ் செஸ் போட்டியின் 3-வது சுற்றில் இந்திய வீரர் அர்ஜுன் எரிகைசி அபார வெற்றியைப் பெற்றார்.

தமிழ்நாடு விளையாட்டு மேம்பாட்டு ஆணையம் சார்பில் ‘சென்னை கிராண்ட் மாஸ்டர்ஸ் செஸ் சாம்பியன்ஷிப்’ போட்டி சென்னையில் நடைபெற்று வருகிறது. தொடரின் 3-வது நாளான நேற்று 3-வது சுற்று ஆட்டங்கள் நடைபெற்றன. இதன் ஒரு ஆட்டத்தில் இந்திய கிராண்ட் மாஸ்டர் அர்ஜுன் எரிகைசியும், செர்பியாவின் அலெக்சாண்டர் ப்ரெட்கேவும் மோதினர். இந்த ஆட்டத்தில் சிறப்பாக விளையாடிய அர்ஜுன் எரிகைசி 71-வது நகர்த்தலில் வெற்றியைப் பெற்றார்.

இந்திய கிராண்ட் மாஸ்டரான பி.ஹரிகிருஷ்ணா தனது 3-வது சுற்றில், உக்ரைனின்பாவெல் எல்ஜனோவுடன் மோதினர். இந்த ஆட்டம் 34-வது நகர்த்தலில் டிராவில் முடிவடைந்தது. மற்றொரு 3-வது சுற்று ஆட்டத்தில் அமெரிக்காவின் லெவோன் அரோனியன், ஹங்கேரியின் சனான் சுகிரோவ் ஆகியோர் விளையாடினர். இந்த ஆட்டம் 40-வது நகர்த்தலில் வெற்றி தோல்வியின்றி டிராவில் முடிவடைந்தது.

ஈரானின் பர்ஹாம் மக்சூட்லூவும், இந்திய வீரர் டி. குகேஷும் 3-வது சுற்று ஆட்டத்தில் விளையாடினர். இந்த ஆட்டம் 30-வது நகர்த்தலில் டிராவில் முடிவடைந்ததது. நேற்று நடைபெற்ற 3-வது சுற்றின் முடிவில் சனான் சுகிரோவ், பி.ஹரிகிருஷ்ணா ஆகியோர் தலா 2 புள்ளிகளுடன் முதல் இரண்டு இடங்களில் உள்ளனர். லெவோன் அரோனியன், டி.குகேஷ், பாவெல் எல்ஜனோவ், அர்ஜுன் எரிகைசி ஆகியோர் தலா 1.5 புள்ளிகளுடன் 3 முதல் 6 இடங்களில் உள்ளனர்.

அலெக்சாண்டர் ப்ரெட்கே, பர்ஹாம் மக்சூட்லூ ஆகியோர் தலாஒரு புள்ளியுடன் முறையே 7 மற்றும் 8-வது இடங்களில் உள்ளனர். இந்நிலையில் இன்று 4-வது சுற்று ஆட்டங்கள் நடைபெறவுள்ளன. இதில் குகேஷ் - அலெக்சாண்டர் ப்ரெட்கே, பாவெல் எல்ஜனோவ்- அர்ஜுன் எரிகைசி, அரோனியன் - பி. ஹரி கிருஷ்ணா,மக்சூட்லூ - சனான் சுகிரோவ் ஆகியோர் மோதுகின்றனர்.