ஜேசன் ராயின் சாதனை 180 ரன்கள்: ஆஸி.யின் 304 ரன்களை விரட்டி இங்கிலாந்து அபார வெற்றி

ஆஸி.யின் 304 ரன்களை மகா விரட்டல் செய்து இங்கிலாந்து அணி 308 ரன்கள் எடுத்து 5 விக்கெட்டுகள் வித்தியாசத்தில் மெல்போர்ன் ஒருநாள் போட்டியில் வென்றது. 5 போட்டிகள் கொண்ட தொடரில் 1-0 முன்னிலை பெற்றது இங்கிலாந்து.

முதலில் பேட் செய்த ஆஸ்திரேலியா ஏரோன் பிஞ்ச் சதத்துடன் 50 ஒவர்களில் 8 விக்கெட்டுகள் இழப்புக்கு 304 ரன்கள் குவிக்க, தொடர்ந்து ஆடிய இங்கிலாந்து 48.5 ஓவர்களில் 308/5 என்று அபார வெற்றி பெற்றது. மெல்போர்னில் இது அதிகபட்ச விரட்டல் ஸ்கோராகும். ஜேசன் ராய் 151 பந்துகளில் 16 பவுண்டரிகள் 5 சிக்சர்களுடன் 180 ரன்களை விளாசினார், இங்கிலாந்து வீரர் ஒருவரின் அதிகபட்ச ஒருநாள் ஸ்கோர் இதுவே. ஜோ ரூட் 110 பந்துகளில் 5 பவுண்டரிகளுடன் 91 ரன்கள் எடுத்தார்.

ஆஸ்திரேலிய பந்து வீச்சு சிதறடிக்கப்பட்டது. மிட்செல் ஸ்டார்க் 10 ஓவர்களில் 71 ரன்கள் கொடுத்து 2 விக்கெட்டுகளைக் கைப்பற்றினாலும் இதில் 9 பவுண்டரிகள் 1 சிக்சரை விட்டுக் கொடுத்தார். லெக் ஸ்பின்னர் ஸாம்ப்பா 10 ஓவர்களில் 73 ரன்கள் விக்கெட் விக்கெட் இல்லை. கமின்ஸ் 10 ஓவர்கள் 63 ரன்கள் 2 விக்கெட். ஜேசன் ராயின் அதிரடியை ஒன்றும் செய்ய முடியவில்லை. அலெக்ஸ் ஹேல்ஸ் பாகிஸ்தானுக்கு எதிராக எடுத்த 171ரன்கள்தான் இங்கிலாந்து ஒருநாள் தனிப்பட்ட வீரர் சாதனையாக இருந்தது.

ராய் இதற்கு முன்னால் இலங்கைக்கு எதிராக 2 ஆண்டுகளுக்கு முன்பாக 162 ரன்கள் எடுத்தார், அதனைக் கடந்தார் தற்போது. ஜோ ரூட்டுடன் இணைந்து ஜேசன் ராய் கூட்டணி அமைத்து இருவரும் சாதனை 221 ரன்கள் கூட்டணி அமைத்தனர்.

முன்னதாக ஏரோன் பிஞ்ச் 119 பந்துகளில் 107 ரன்கள் எடுத்து இங்கிலாந்துக்கு எதிராக 4-வது ஒருநாள் சதத்தை எடுத்தார்.

மார்கஸ் ஸ்டாய்னிஸ் (40 பந்துகளில் 60), மிட்செல் மார்ஷ் (68 பந்துகளில் 50) அருமையாக ஆடி ஆஸ்திரேலியாவை நிலை நிறுத்தினர், முன்னதாக டேவிட் வார்னர் (2), ஸ்டீவ் ஸ்மித் (23) ஆகியோர் சொற்ப ரன்களில் ஆட்டமிழந்தனர். வார்னர் குறிப்பாக மார்க் உட்டின் ஆக்ரோஷமான ஷார்ட் பிட்ச் பந்தில் வெளியேறினார், ஸ்மித், அடில் ரஷித் பந்தில் வெளியேறினார். மொயின் அலி மோசமான ஆஷஸ் தொடரை மறக்கும் விதமாக சிக்கனமாக வீசி 10 ஓவர்களில் 39 ரன்களுக்கு 1 விக்கெட்டைக் கைப்பற்றினார். இவர்தான் பிஞ்ச் விக்கெட்டை வீழ்த்தினார்.

இங்கிலாந்து அணியில் பேர்ஸ்டோ 14 ரன்களிலும் மோர்கன் 1 ரன்னிலும் பட்லர் 4 ரன்களிலும் வெளியேறினர். ஆட்ட நாயகனாக ஜேசன் ராய் தேர்வு செய்யப்பட்டார்.

5 போட்டிகள் கொண்ட தொடரில் இங்கிலாந்து முன்னிலை பெற்றதையடுத்து அடுத்த போட்டி பிரிஸ்பனில் வெள்ளியன்று நடைபெறுகிறது