ஏரோன் பிஞ்ச் சதம் 2-வது முறையாக வீண்: ஆஸ்திரேலியாவை வீழ்த்தியது இங்கிலாந்து

பிரிஸ்பன் மைதானத்தில் நடைபெற்ற 2-வது ஒருநாள் கிரிக்கெட் போட்டியில் இங்கிலாந்து 4 விக்கெட்டுகள் வித்தியாசத்தில் ஆஸ்திரேலியாவை அபார வெற்றி பெற்றது.

டாஸ் வென்ற ஸ்டீவ் ஸ்மித் முதலில் பேட்டிங்கைத் தேர்வு செய்ய பிஞ்ச் தொடர்ச்சியாக 2வது சதத்தை எடுத்தார், ஆஸ்திரேலியா 50 ஓவர்களில் 9 விக்கெட்டுகள் இழப்புக்கு 270 ரன்கள் எடுத்தது. தொடர்ந்து ஆடிய இங்கிலாந்து பேர்ஸ்டோ, ஹேல்ஸ் அரைசதங்களுடனும் ஜோ ரூட் (46), பட்லர் (42) ஆகியோரது முக்கியப் பங்களிப்புகளினாலும் 44.2 ஓவர்களில் 274/6 என்று வெற்றி பெற்றது. ஆட்ட நாயகனாக 2 விக்கெட்டுகளையும், 46 ரன்கள் எடுத்து நாட் அவுட்டாகவும் இருந்த ஜோ ரூட் தேர்வு செய்யப்பட்டார்.

பேர்ஸ்டோ (60), ஹேல்ஸ் (57) இணைந்து 2-வது விக்கெட்டுக்காக 117 ரன்களைச் சேர்த்தனர். முன்னதாக மெல்போர்னில் சாதனை 180 ரன்களை விளாசிய ஜேசன் ராய் 2 ரன்களில் மிட்செல் ஸ்டார்க் பந்தை ஷார்ட் மிட்விக்கெட்டில் கேட்ச் கொடுத்து பெவிலியன் திரும்பினார்.

பேர்ஸ்டோ, ஹேல்ஸ் இருவருமே ஆஸ்திரேலிய அறிமுக வீச்சாளர் ஜை ரிச்சர்ட்சனிடம் ஆட்டமிழந்தனர். நடுவில் மிட்செல் ஸ்டார்க் 38வது ஓவரில் பட்லரின் எட்ஜைப் பிடித்தார். பிறகு அதே ஓவரில் மொயின் அலி (1) யார்க்கரில் பவுல்டு ஆகி வெளியேறினார். 227/6 என்று சற்றே கவலைக்கிடமானது.

ஆனால் ஜோ ரூட் (46 நாட் அவுட்), கிறிஸ் வோக்ஸ் (27 பந்துகளில் 5 பவுண்டரிகள் 1 சிக்சர் 39 நாட் அவுட்) ஆகியோர் 5.4 ஓவர்கள் மீதம் வைத்து இங்கிலாந்தை வெற்றிக்கு இட்டுச் சென்றனர். பிரிஸ்பனில் ஆஸ்திரேலியாவுக்கு எதிராக 8 ஒருநாள் போட்டிகளில் 2-வது வெற்றியை இங்கிலாந்து பெற்றது, அதுவும் 1999-க்குப் பிறகு பிரிஸ்பனில் வெற்றி பெறுகிறது.

முன்னதாக மெல்போர்னில் சதம் கண்ட பிஞ்ச், பிரிஸ்பனில் இன்று 114 பந்துகளில் 9 பவுண்டரிகள் 1 சிக்சருடன் 106 ரன்கள் எடுத்து இங்கிலாந்து பவுலிங்கை ஆதிக்கம் செலுத்தினார். இங்கிலாந்துக்கு எதிராக 18 இன்னிங்ஸ்களில் இவரது 5-வது சதமாகும் இது. மொத்தமாக இவரது 10-வது சதம் இது.

டேவிட் வார்னர் 35 ரன்கள் எடுத்து மொயின் அலி பந்தில் எட்ஜ் ஆகி ஸ்லிப்பில் ஜோ ரூட்டிடம் கேட்ச் கொடுத்தார். 35-ல் 5 பவுண்டரிகள் அடங்கும். ஜோ ரூட் தன் பந்து வீச்சில் ஸ்மித் (18) விக்கெட்டை எல்.பியில் வீழ்த்தினார். ரிவியூவையும் காலி செய்தார். பிறகு டிராவிஸ் ஹெட் (7) விக்கெட்டையும் ஜோ ரூட் தன் பவுலிங்கில் தானே கேட்ச் ஆக்கி வெளியேற்றினார்.

அடில் ரஷித் (2/71), மொயின் அலி (1/31), ஜோ ரூட் (2/31) ஆகியோருக்கு பிட்சில் சற்றே உதவி இருந்தது. பிஞ்ச் வார்னர் ஜோடி முதல் விக்கெட்டுக்காக 11.4 ஓவர்களில் 68 ரன்கள் சேர்த்தனர். மிட்செல் மார்ஷ் (36) உடன் இணைந்து பிஞ்ச் 85 ரன்கள் சேர்த்தார். 40வது ஓவரில் ஆஸ்திரேலியா 209/3 என்று இருந்தது. கேமரூன் ஒயிட் 15 ரன்களையும் விக்கெட் கீப்பர் கேரி 27 ரன்களையும் எடுக்க ஆஸ்திரேலியா 270/9 என்று முடிந்தது.

ஏரோன் பிஞ்ச் சதம் எடுத்த பிறகு லியாம் பிளெங்கட் பந்தை மிட் ஆனில் ராயிடம் கேட்ச் கொடுத்து வெளியேறினார். இது பிளங்கெட்டின் 100வது ஒருநாள் விக்கெட். இவரது முதல் விக்கெட் பாகிஸ்தானின் மொகமது யூசுப், இது 13 ஆண்டுகளுக்கு முன்பாக எடுக்கப்பட்ட விக்கெட்.

3-வது போட்டி ஆஸ்திரேலியாவுக்கு வாழ்வா, சாவா போட்டியாகும், இது சிட்னியில் ஞாயிறன்று நடைபெறுகிறது.