கத்தார் மாஸ்டர்ஸ் செஸ் போட்டி: மேக்னஸ் கார்ல்சனை வீழ்த்தினார் தமிழக வீரர் கார்த்திகேயன் முரளி

கத்தார்: கத்தாரில் மாஸ்டர்ஸ் செஸ் போட்டி நடைபெற்று வருகிறது. இந்தப் போட்டியில் பல்வேறு நாடுகளைச் சேர்ந்த முன்னணி வீரர்கள் கலந்து கொண்டுள்ளனர். இந்தத் தொடரின் 7-வது சுற்றில் உலக சாம்பியனும், முதல் நிலை வீரருமான நார்வேயின் மேக்னஸ் கார்ல்சனை எதிர்கொண்டார் இந்திய வீரர் கார்த்திகேயன் முரளி.

இதில் 40-வது காய் நகர்த்தலின் போது கார்த்திகேயன் முரளி வெற்றி பெற்றார். இதன் மூலம் கிளாசிக் போட்டியில் கார்ல்சனை வீழ்த்திய 3-வது இந்தியர் என்ற பெருமையை பெற்றுள்ளார் தமிழகத்தின் தஞ்சாவூரைச் சேர்ந்த கார்த்திகேயன் முரளி. இதற்கு முன்னர் ஹரி கிருஷ்ணா, விஸ்வநாதன் ஆனந்த் ஆகியோரும் கிளாசிக்கல் போட்டியில் மேக்னஸ் கார்ல்சனை வீழ்த்தி உள்ளனர்.

7 சுற்றுகள் முடிவடைந்துள்ள நிலையில் கார்த்திகேயன் முரளி 5.5 புள்ளிகளுடன் முதலிடத்தை 5 பேருடன் பகிர்ந்து கொண்டுள்ளார். இந்திய கிராண்ட் மாஸ்டர்களான நாராயணன், அர்ஜூன் எரிகைசி, உஸ்பெகிஸ்தானின் ஜாவோகிர் சிந்தரோவ், யாகுபோயேவ் நோடிர்பெக், ரஷ்யாவின் டேவிட் பரவ்யன் ஆகியோரும் தலா 5.5 புள்ளிகளை பெற்றுள்ளனர். இந்தத் தொடரில் இன்னும் இரு சுற்றுகள் மீதம் உள்ளன.