ஆஸ்திரேலிய ஓபன் கிராண்ட்ஸ்லாம் டென்னிஸ்: வீனஸ் வில்லியம்ஸ் அதிர்ச்சி தோல்வி

ஆஸ்திரேலிய ஓபன் கிராண்ட்ஸ்லாம் டென்னிஸ் போட்டியின் மகளிர் ஒற்றையர் பிரிவு முதல் சுற்று ஆட்டத்தில் முன்னணி டென்னிஸ் வீராங்கனையான வீனஸ் வில்லியம்ஸ் அதிர்ச்சி தோல்வி கண்டு வெளியேறினார்.

ஆஸ்திரேலியாவின் மெல்பர்ன் நகரில் கிராண்ட்ஸ்லாம் டென்னிஸ் போட்டி நேற்று தொடங்கியது. மகளிர் முதல் சுற்று ஒற்றையர் ஆட்டத்தில் அமெரிக்காவின் வீனஸ் வில்லியம்ஸ், ஸ்விட்சர்லாந்தின் பெலிண்டா பென்கிக்குடன் மோதினார்.

இதில் சிறப்பாக விளையாடிய பென்கிக் 6-3, 7-5 என்ற கணக்கில் வீனஸை வீழ்த்தினார். இதனால் வீனஸ் வில்லியம்ஸ் ரசிகர்கள் அதிர்ச்சி அடைந்தனர். இரண்டு செட்களிலுமே பெலிண்டாவின் சர்வீஸ்களை முறியடிக்க வீனஸ் சிரமப்பட்டார். முதல் செட்டில் சரணடைந்த வீனஸ் இரண்டாவது செட்டில் சுதாரித்து ஆடினார். ஆனாலும் பென்கிங் அருமையாக விளையாடி வீனஸைச் சாய்த்தார்.

இதேபோல ஆடவர் ஒற்றையர் முதல் சுற்றில் ஸ்பெயின் வீரர் ரபேல் நடால் வெற்றி பெற்று அடுத்த சுற்றில் நுழைந்தார்.நடால் 6-1, 6-1, 6-1 என்ற நேர் செட்களில் டொமினிக் குடியரசு நாட்டின் விக்டெர் எஸ்டரலாவை வென்றார்.

பாம்ப்ரி தோல்வி

ஆஸ்திரேலிய ஓபன் கிராண்ட்ஸ்லாம் டென்னிஸ் போட்டியின் ஆடவர் ஒற்றையர் முதல் சுற்றில் இந்திய வீரர் யூகி பாம்ப்ரி தோல்வி கண்டு வெளியேறினார்.

முதல் சுற்று ஆட்டத்தில் யூகி பாம்ப்ரி, சைப்ரஸ் வீரர் மார்கோஸ் பாக்தாதிஸுடன் மோதினார். இதில் மார்கோஸ் 7-6(4), 6-4, 6-3 என்ற செட் கணக்கில் மார்கோஸ் வெற்றி கண்டார்.