வார ராசிபலன் 17-9-2015 முதல் 23-9-2015 வரை (துலாம் முதல் மீனம் வரை)

துலாம் ராசி வாசகர்களே

உங்கள் ராசிக்கு 6-ல் கேதுவும், 11-ல் சூரியனும் செவ்வாயும் புதனும் குருவும் சஞ்சரிப்பதால் வெற்றி வாய்ப்புகள் அதிகரிக்கும். எதிரிகள் அடங்கிப் போவார்கள். வழக்கில் சாதகமான தீர்ப்பு கிடைக்கும். மன உற்சாகம் பெருகும். எடுத்த காரியங்களில் திறம்பட ஈடுபட்டு வெற்றி பெறுவீர்கள். பொருளாதார நிலை உயரும். பல வழிகளில் ஆதாயம் வந்து சேரும். குடும்பத்தில் சுப காரியங்கள் நிகழும். புத்திர, புத்திரிகளால் அனுகூலம் ஏற்படும். அரசியல் ஈடுபாடு ஆக்கம் தரும். நிர்வாகத்திறமை கூடும்.

உத்தியோகஸ்தர்களுக்குப் பதவி உயர்வு, இடமாற்றம், ஊதிய உயர்வு கிடைக்கும். முயற்சி வீண்போகாது. முன்னேற்றத்துக்காக தகவல் வந்து சேரும். தெய்வப் பிரார்த்தனைகளை நிறைவேரற்றிக் கொள்ளச் சந்தர்ப்பம் உருவாகும். உடன்பிறந்தவர்களால் நலம் உண்டாகும். பிதுராரஜிதச் சொத்துகள் சிலருக்கு இப்போது கிடைக்கும். நீண்ட நாட்களாக எண்ணியிருந்த காரியங்கள் இப்போது எளிதில் நிறைவேறும். 18-ம் தேதி முதல் சூரியன் 12-ம் இடம் மாறி, ராகுவுடன் கூடுவது சிறப்பாகாது. கண், கால் பாதம் சம்பந்தமான உபாதைகள் ஏற்படும். அக்கம்பக்கத்தில் உள்ளவர்களால் பிரச்சினைகள் சூழும். பக்குவமாகச் சமாளிக்கவும்.

அதிர்ஷ்டமான தேதிகள்: செப்டம்பர் 17, 21, 23.

திசைகள்: கிழக்கு, வடமேற்கு, வடகிழக்கு, தெற்கு, வடக்கு.

நிறங்கள்: மெரூன், இளநீலம், வெண்மை, பொன் நிறம், சிவப்பு.

எண்கள்: 1, 3, 5, 6, 7, 9.

பரிகாரம்: துர்கையம்மனை வழிபடவும்.

விருச்சிக ராசி வாசகர்களே

உங்கள் ராசிநாதன் செவ்வாய் 10-ல் சூரியன், புதன், குரு ஆகியோருடன் கூடியிருப்பது விசேஷமாகும். எடுத்த காரியங்களில் வெற்றி பெறுவீர்கள். ஒன்றுக்கும் மேற்பட்ட தொழில்களில் ஈடுபட்டு வருவாய் பெறச் சந்தர்ப்பம் கூடிவரும். அரசு உதவி கிடைக்கும். எதிரிகள் அடங்கிப் போவார்கள். மனதில் தன்னம்பிக்கையும் துணிவும் அதிகரிக்கும். முக்கியஸ்தர்களது தொடர்பால் நலம் பெறுவீர்கள். பொருள்வரவு கூடும். உழைப்பு வீண்போகாது. நிர்வாகத்திறமை பளிச்சிடும்.

வியாபாரம் பெருகும். கணிதம், எழுத்து, பத்திரிகை போன்ற துறைகள் லாபம் தரும். சுக்கிரன் 9-ல் இருப்பதால் கலைஞர்களுக்கு வரவேற்பு கூடும். பெண்கள், வாழ்க்கைத்துணைவியால் அனுகூலம் உண்டாகும். புனிதமான காரியங்களில் ஈடுபாடு கூடும். நிலம், மனை, வீடு, வாகனங்களின் சேர்க்கையோ, அவற்றால் ஆதாயமோ கிடைக்கும். அரசுப்பணியாளர்களது நிலை உயரும். பொறியியல், சட்டம், காவல், ராணுவம், மருத்துவம், விஞ்ஞானம் போன்ற துறைகளைச் சேர்ந்தவர்கள் சுபிட்சம் காண்பார்கள்.

அதிர்ஷ்டமான தேதிகள்: செப்டம்பர் 21, 23.

திசைகள்: தென்மேற்கு, வடக்கு, கிழக்கு, தெற்கு.

நிறங்கள்: சிவப்பு, வெண்சாம்பல் நிறம், பச்சை, ஆரஞ்சு.

எண்கள்: 1, 4, 5, 6, 9.

பரிகாரம்: ஜன்ம சனிக்கும் 5-ல் உலவும் கேதுவுக்கும் பிரீதி, பரிகாரங்களைச் செய்வது நல்லது.

தனுசு ராசி வாசகர்களே

உங்கள் ராசி அதிபதி குரு 9-ல் சூரியன், செவ்வாய், புதன், ஆகியோருடன் கூடியிருப்பது சிறப்பு . சுக்கிரன், ராகுவின் சஞ்சாரமும் அனுகூலமாக இருப்பதால் முக்கியமான எண்ணங்கள் இபோது நிறைவேறும். நண்பர்கள், உறவினர்களால் நலம் உண்டாகும். தொலைதூரத் தொடர்பு பயன்படும். பொருளாதார நிலையில் வளர்ச்சி காண வழிபிறக்கும். திடீர் அதிர்ஷ்ட வாய்ப்புகளும் கூடிவரும். தெய்வப் பணிகள் நிறைவேறும்.

தர்ம காரியங்களில் ஈடுபாடு உண்டாகும். பிள்ளைகள் நலம் மகிழ்ச்சி தரும். மகப்பேறு பாக்கியம் சிலருக்கு இப்போது கிடைக்கும். சாதுக்களின் தரிசனம் பெறச் சந்தர்ப்பம் உருவாகும். 4-ல் கேதுவும், 12-ல் சனியும் இருப்பதால் தாய் நலனில் அக்கறை தேவை. வீண் செலவுகளைத் தவிர்ப்பது நல்லது. சிலர் குடும்பத்தை விட்டுப் பிரிந்து வெளியூர், வெளிநாடு சென்று வாழ வேண்டிவரும். கண், கால் சம்பந்தமான உபாதைகள் சிலருக்கு ஏற்படும். சொத்துகள் சம்பந்தமான காரியங்களில் விழிப்புடன் ஈடுபடுவது நல்லது.

அதிர்ஷ்டமான தேதிகள்: செப்டம்பர் 17, 21, 23.

திசைகள்: தென்மேற்கு, வடகிழக்கு, தென்கிழக்கு, கிழக்கு.

நிறங்கள்: பச்சை, புகை நிறம். வெண்மை, இளநீலம், பொன் நிறம்.

எண்கள்: 1, 3, 4, 5, 6, 9.

பரிகாரம்: சனி, கேதுவுக்கு அர்ச்சனை, ஆராதனைகளைச் செய்து வழிபடுவது நல்லது. கால் ஊனமுள்ளவர்களுக்கு உதவவும்.

மகர ராசி வாசகர்களே

உங்கள் ராசிக்கு 3-ல் கேதுவும், 8-ல் புதனும், 11-ல் சனியும் உலவுவது நல்லது. எடுத்த காரியங்களில் எப்பாடுபட்டாவது வெற்றி பெறுவீர்கள். வாழ்க்கைத்துணைவரால் அளவோடு அனுகூலம் உண்டாகும். பொது நலப்பணிகளில் ஆர்வம் கூடும். இரும்பு, எஃகு, எண்ணெய் வகையறாக்கள், கச்சாப்பொருட்கள் மூலம் லாபம் கிடைக்கும். கறுப்பு நிறப்பொருட்களால் வருவாய் அதிகரிக்கும். உழைப்பு வீண்போகாது.

ஆன்மிக, அறநிலையப்பணியாளர்களுக்கு முன்னேற்றமான சூழ்நிலை நிலவிவரும். வியாபாரிகளுக்கு அளவோடு லாபம் கிடைக்கும். 7-ல் சுக்கிரன் இருப்பதால் பெண்களால் சில இடர்பாடுகள் உண்டாகும். 8-ல் சூரியன், செவ்வாய், குரு உலவுவதால் பொருளாதாரம் சம்பந்தமான இனங்களில் எச்சரிக்கை தேவை. உஷ்ண சம்பந்தமான உபாதைகள் ஏற்படும். மக்கள் நலனிலும் தந்தை நலனிலும் கவனம் தேவை. அரசாங்கத்தாரால் சங்கடம் உண்டாகும். வாரக் கடைசியில் செலவுகள் சற்று அதிகரிக்கும். சிக்கன நடவடிக்கை தேவை.

அதிர்ஷ்டமான தேதிகள்: செப்டம்பர் 17, 23.

திசைகள்: மேற்கு, வடமேற்கு, வடக்கு.

நிறங்கள்: பச்சை, நீலம், மெரூன்.

எண்கள்: 5, 7, 8.

பரிகாரம்: செவ்வாய், குருவுக்குப் பிரீதி, பரிகாரங்களைச் செய்வது நல்லது. பராசக்தியை வழிபடவும்.

கும்ப ராசி வாசகர்களே

உங்கள் ராசிக்கு 7-ல் குருவும், 10-ல் சனியும் உலவுவது சிறப்பு. நல்லவர்களின் தொடர்பு நலம் சேர்க்கும். நல்லவர் அல்லாதவர்களை விட்டு விலகுவதன் மூலம் சங்கடங்களுக்கு ஆளாகாமல் தப்பலாம். தொலைதூரத் தொடர்பு பயன்படும். எதிரிகள் கட்டுக்குள் அடங்கி இருப்பார்கள். உழைப்புக்கும் திறமைக்கும் உரிய பயன் கிடைத்துவரும். உத்தியோகஸ்தர்கள், தொழிலாளர்களுக்கு முன்னேற்றமான சூழ்நிலை நிலவிவரும். பதவி உயர்வு, இடமாற்றம், ஊதிய உயர்வு ஆகியவை பெறச் சந்தர்ப்பம் உருவாகும்.

சுப காரியங்கள் நிகழும். கணவன்-மனைவி இடையே சிறுசிறு சச்சரவுகள் ஏற்பட்டு விலகும். கலைத்துறையினர், பெண்களுக்குச் சோதனைகள் சூழும். பக்குவமாகச் சமாளிப்பது நல்லது. முன்பின் அறிமுகம் இல்லாதவர்களை நம்பி ஏமாற வேண்டாம். பேச்சிலும் உணவுப் பழக்கத்திலும் கட்டுப்பாடு தேவை. உஷ்ணாதிக்கத்தைக் குறைத்துக் கொள்வது நல்லது. ஆடவர்களுக்குப் பெண்களால் பிரச்சினைகள் சூழும். வாகனங்களில் செல்லும்போது எச்சரிக்கை தேவை.

அதிர்ஷ்டமான தேதிகள்: செப்டம்பர் 17, 21, 23 (முற்பகல்).

திசைகள்: வடகிழக்கு, மேற்கு.

நிறங்கள்: நீலம், பொன் நிறம்,.

எண்கள்: 3, 8.

பரிகாரம்: சுமங்கலிப் பிரார்த்தனை செய்வது நல்லது. சக்தி வழிபாடு நலம் தரும். நாகரை வழிபடுவது அவசியம்.

மீன ராசி வாசகர்களே

சூரியனும் செவ்வாயும் சுக்கிரனும் அனுகூலமாக உலவுகிறார்கள். எதிர்ப்புகளைச் சமாளிக்கும் ஆற்றலைப் பெறுவீர்கள். அரசு விவகாரங்கள் ஆக்கம் தரும். முக்கியஸ்தர்கள் உதவுவார்கள். நிர்வாகத்திறமையாலும் செயல் வேகத்தாலும் ஓரிரு சாதனைகளை ஆற்றுவீர்கள். உடன்பிறந்தவர்கள், தந்தையால் அனுகூலம் உண்டாகும். வாழ்க்கைத்துணைவரால் அளவோடு அனுகூலம் உண்டாகும். இயந்திரப்பணிகள் லாபம் தரும். எரிபொருட்கள், வெடிப்பொருட்கள், மின்சாரம், போன்ற துறைகளால் ஆதாயம் கிடைக்கும். சட்டம், காவல், ராணுவம் போன்ற துறைகளைச் சேர்ந்தவர்கள் சாதனை பல ஆற்றுவார்கள்.

மனத்துணிவு கூடும். கலைத்துறை ஊக்கம் தரும். பெண்களின் எண்ணம் ஈடேறும். பிள்ளைகளால் சிறுசிறு இடர்பாடுகளும் மன வருத்தமும் ஏற்படும். வயிறு சம்பந்தமான உபாதைகள் உண்டாகும். உத்தியோகஸ்தர்கள், ஆசிரியர்கள், ஆன்மிகவாதிகள் பொறுப்புணர்ந்து காரியமாற்றி வருவது நல்லது.

அதிர்ஷ்டமான தேதிகள்: செப்டம்பர் 21, 23.

திசைகள்: கிழக்கு, தென்கிழக்கு, தெற்கு.

நிறங்கள்: ஆரஞ்சு, வெண்மை, இளநீலம், சிவப்பு .

எண்கள்: 1, 6, 9.

பரிகாரம்: குரு, ராகு, கேதுவுக்குப் பிரீதி, பரிகாரங்களைச் செய்வது நல்லது. பெரியவர்களின் அதிருப்திக்கு ஆளாகாமல் இருப்பது அவசியம்.