வடபழனி முருகன் கோயிலில் வைகாசி விசாக பிரம்மோற்சவம் நாளை தொடக்கம்

சென்னை: வடபழனி முருகன் கோயிலில் வைகாசி விசாக பிரம்மோற்சவ விழா கொடியேற்றத்துடன் நாளை தொடங்குகிறது. மே 19-ம் தேதி தேரோட்டம் நடைபெறுகிறது.

வடபழனியில் உள்ள பிரசித்தி பெற்ற முருகன் கோயிலில் வைகாசி விசாகத்தை முன்னிட்டு 10 நாட்கள் பிரம்மோற்சவ விழாவெகுவிமரிசையாகக் கொண்டாடப்பட உள்ளது. அந்த வகையில், 12-ம் தேதி (இன்று) மாலை 5 மணிக்கு மூஷிக வாகன புறப்பாடு நடக்கிறது. தொடர்ந்து, பிரம்மோற்சவத்தின் முதல் நாளான நாளை காலை 6 மணிக்கு மேல் 7 மணிக்குள் துவஜாரோஹணம் எனும் கொடியேற்ற வைபவம் நடக்கிறது.

அதைத்தொடர்ந்து, இரவு 7 மணிக்கு மங்களகிரி விமானத்தில் வள்ளி தெய்வயானை சமேத சுப்பிரமணியர் வீதி உலா நடக்கிறது. 14-ம்தேதி காலை 7 மணிக்கு சூரிய பிரபை, இரவு 7 மணிக்கு சந்திர பிரபை புறப்பாடும், 15-ம் தேதி இரவு 7 மணிக்கு ஆட்டுக்கிடா வாகனத்தில் வள்ளி தெய்வயானை சமேத சுப்பிரமணியர் வீதி உலாவும் நடக்கிறது.

மே 16-ம் தேதி நாக வாகனத்தில் சுப்பிரமணியர் அருள்பாலிக்கிறார். 17-ம் தேதி இரவு 7 மணிக்கு பஞ்சமூர்த்தி புறப்பாடும், 18-ம் தேதி இரவு 7 மணிக்கு யானை புறப்பாடும் நடைபெறுகிறது. பிரம்மோற்சவத்தின் முக்கிய நிகழ்வான தேரோட்டம் 19-ம் தேதி காலை நடைபெறுகிறது. காலை 7 முதல் 9 மணிக்குள் பக்தர்களால் தேர் வடம்பிடிக்கப்படுகிறது. தொடர்ந்து, இரவு ஒய்யாளி உற்சவமும், 20-ம் தேதி இரவு 7 மணிக்கு குதிரை வாகன புறப்பாடும் நடைபெறுகிறது.

21-ம் தேதி இரவு 7 மணிக்கு ஆண்டவர் வீதி உலா வந்து பக்தர்களுக்கு அருள்பாலிக்கிறார். வைகாசி விசாகமான 22-ம் தேதிகாலை 9 மணிக்கு வள்ளி தெய்வயானை சமேத சண்முகர் வீதி உலாவும், காலை 10 மணிக்கு தீர்த்தவாரி உற்சவமும், கலசாபிஷேகமும் நடக்கிறது. தொடர்ந்து, மாலை 6 மணிக்கு திருக்கல்யாண உற்சவம், மயில்வாகனத்தில் புறப்பாடுநடக்கிறது. இரவு 9 மணிக்கு சுப்பிரமணியர் வீதி உலா நடைபெறுகிறது. அதைத்தொடர்ந்து, துவஜ அவரோஹணம் எனும் கொடியிறக்கத்துடன் பிரம்மோற்சவ விழா நிறைவு பெறுகிறது. பிரம்மோற்சவ நாட்களில் 14-ம் தேதி முதல் 21-ம் தேதி வரை தினமும் காலை 7 மணிக்கு மங்களகிரி விமான புறப்பாடு நடைபெறும்.

மே 23-ம் தேதி இரவு விசேஷ புஷ்பப் பல்லக்கு புறப்பாடு சுப்பிரமணியர் வீதி உலா நடக்கிறது. அதன்பின்னர், வைகாசி விசாக பிரம்மோற்சவ விடையாற்றி கலை நிகழ்ச்சிகள் 24-ம் தேதி முதல் ஜூன் 2-ம் தேதி வரை தினமும் மாலைநடைபெறுகிறது. இதில் பரதநாட்டியம், சொற்பொழிவு, இன்னிசைக் கச்சேரி, வீணை கச்சேரி, இசைச் சொற்பொழிவு ஆகியவை நடைபெற உள்ளன.