பங்குனி உத்திரத் திருவிழா: பழநி முருகன் கோயிலில் இன்று திருக்கல்யாண உற்சவம்

பழநி: பழநி தண்டாயுதபாணி சுவாமி கோயிலின் உபகோயிலான திருஆவினன்குடி கோயிலில், பங்குனி உத்திரத் திருவிழா கடந்த 18-ம்தேதி கொடியேற்றத்துடன் தொடங்கியது. தினமும் கிரி வீதிகளில் தங்க மயில், வெள்ளி மயில், ஆட்டுக்கிடா, காமதேனு உள்ளிட்ட வாகனங்களில் சுவாமி உலா வந்து, பக்தர்களுக்கு அருள்பாலித்தார்.

விழாவின் 6-ம் நாளான இன்றுமாலை 6 மணியளவில் திருக்கல்யாண உற்சவம் நடைபெறுகிறது. இரவு 8.30 மணிக்கு மேல் சுவாமி மணக்கோலத்தில் வெள்ளித் தேரில் உலா வருகிறார்.

விழாவின் முக்கிய நிகழ்வானபங்குனி உத்திரத் தேரோட்டம்நாளை (ஞாயிற்றுக்கிழமை) மாலை 4 மணிக்கு நடைபெற உள்ளது. கிரி வீதிகளில் வள்ளி-தெய்வானை சமேத முத்துக்குமார சுவாமி தேரில் வலம் வந்து பக்தர்களுக்கு அருள் பாலிக்கிறார்.

திருவிழாவையொட்டி நேற்று திரளான பக்தர்கள் தீர்த்தக் காவடி, மயில் காவடி எடுத்து மலைக் கோயிலுக்கு வந்து, தங்களது நேர்த்திக்கடனை செலுத்தினர்.

பக்தர்களின் வசதிக்காக வரும் 26-ம் தேதி வரை திருச்சி, மதுரை,தேனி, கோவை உள்ளிட்ட பல்வேறு மாவட்டங்களில் இருந்தும் பழநிக்கு அரசுப் போக்குவரத்துக் கழகம் சார்பில் சிறப்பு பேருந்துகள் இயக்க ஏற்பாடு செய்யப்பட்டுள்ளன.