2017-ம் ஆண்டின் நிறைவுப் பிரதோஷம்... சனிப் பிரதோஷம் சர்வ பாப விமோசனம்!

சனிப் பிரதோஷம் சர்வ பாப விமோசனம் என்பார்கள் ஆச்சார்யப் பெருமக்கள். நாளை 30.12.17 சனிக்கிழமை நாளில்... இந்த 2017ம் வருடத்தின் நிறைவுப் பிரதோஷம் சனிப் பிரதோஷமாக வருகிறது. மறக்காமல், நாளைய பிரதோஷத்தில், சிவாலயம் சென்று நந்திதேவரையும் தென்னாடுடைய ஈசனையும் வணங்கி, சகல செளபாக்கியங்களும் கிடைக்கப் பெறுங்கள். சந்ததி சிறக்க, சந்தோஷம் நிலைக்க வாழ்வீர்கள் என்பது உறுதி!

வருடத்திற்கு 24 பிரதோஷங்கள் உள்ளன. பிரதோஷ நாளில், சிவாலயம் செல்வதும் சிவ தரிசனம் செய்வதும் மிகுந்த விசேஷங்களைத் தரவல்லது என்பார்கள். நடக்க இயலாதவர்கள், பெரியவர்கள், இன்னொருவரின் துணையுடன் வெளியே வருபவர்கள் சித்திரை மாதத்தில் வருகிற பிரதோஷங்களையும் வைகாசி மாதத்தில் வருகிற பிரதோஷங்களையும் தவறாமல் கோயிலுக்குச் சென்று தரிசித்தால், ஒரு வருடத்தின் அத்தனைப் பிரதோஷங்களையும் தரிசித்த பலனும் புண்ணியமும் கிடைக்கும் என்கிறார் சென்னை நங்கநல்லூர் அர்த்தநாரீஸ்வரர் கோயிலின் பாலாஜி வாத்தியார்.

அதேபோல் ஐப்பசி. கார்த்திகை மாத பிரதோஷங்களும் முக்கியமானவை, நல்ல நல்ல பலன்களை வழங்கி பலம் தருபவை. ஆக, இந்த நான்கு மாதங்களையும் சேர்த்தால், எட்டு பிரதோஷங்கள் வருகின்றன. இந்த எட்டுப் பிரதோஷ நாளிலும், மறக்காமல் சிவாலயம் செல்ல வேண்டியது அவசியம்!

ஆங்கில மாதங்களின் அடிப்படையில் பேசுவதும் செயல்படுவதுமாக மாறிவிட்ட உலகம் இது. அப்படிப் பார்க்கும் போது, இதோ... நாளைய தினம், 30.12.17 சனிக்கிழமை அன்று வருகிறது பிரதோஷம். இது சனிப் பிரதோஷம்! 2017ம் வருடத்தின் நிறைவுப் பிரதோஷம்.

மேலும் இந்த எட்டுப் பிரதோஷங்களுக்குச் சென்று சிவ தரிசனம் செய்தால், ஒரு வருடம் முழுவதும் உள்ள 24 பிரதோஷங்களையும் தரிசித்த பலன் கிடைக்கும் என்கிறார்கள் ஆச்சார்யர்கள்!

அடுத்து... சனிப் பிரதோஷம் சர்வ பாப விமோசனம் என்றொரு வாசகம் உண்டு. இந்தச் சத்திய வார்த்தையின் படி சனிப் பிரதோஷ நாளில், ஏராளமான பக்தர்கள் சிவாலயம் சென்று தரிசிப்பார்கள். இன்னும் குறிப்பாகச் சொல்ல வேண்டுமெனில்... உங்களின் நட்சத்திர நாளும் பிரதோஷமும் இணைந்து வந்தால்... அந்த நாளில் மறக்காமல் சிவனாரை வழிபடுங்கள். சிக்கல்கள் தீரும். கவலைகள் பறந்தோடும். துக்கங்கள் விலகிப்போகும். சந்தோஷம் நிலைத்திருக்கும்! இழந்த பதவியை, பொருளை, மதிப்பு மரியாதையைப் பெறுவீர்கள் என்பது உறுதி!

நந்திதேவருக்கும் சிவபெருமானுக்கும் பிரமாதமாக, பிரமாண்டமாக அபிஷேக ஆராதனைகள் நடைபெறும். அபிஷேகப் பொருட்கள் வழங்குங்கள். வில்வமும் செவ்வரளியும் நந்திதேவருக்கு அருகம்புல்லும் வழங்குங்கள். எல்லா நலமும் வளமும் பெற்று இனிதே வாழலாம்! வீட்டில் உள்ள தரித்திர நிலை காணாது போகும். சுபிட்சம் குடிகொள்ளும்!

இந்த வருடத்தின்... 2017 - ம் வருடத்தின் நிறைவுப் பிரதோஷம். அதுவும் சனிப் பிரதோஷம்! நாளை 30.12.17ம் தேதியை மறக்காமல், மாலையில் சிவாலய தரிசனம் செய்யுங்கள். நமசிவாய என்று ஜபித்தபடி பிரார்த்தனை செய்யுங்கள்.

தென்னாடுடைய சிவனே போற்றி.

எந்நாட்டவர்க்கும் இறைவா போற்றி!