ஐயப்ப சுவாமியின் அற்புதத் தகவல்கள்!

* பந்தளத்தில் இருந்து சபரிமலை வரை ஐயப்ப சுவாமியின் ஆபரணப் பெட்டியை சுமந்து வர 15 சங்கங்கள் உள்ளன.

* சபரிமலையில் வருடந்தோறும் ஜனவரி 19-ம் தேதி மண்டலபூஜை நிறைவு பெறும். அன்று தண்ணீரில் குங்குமம் கலந்து மஞ்சமாதா சந்நிதியில் பூஜை செய்வார்கள். இதற்கு குருதி பூஜை என்று பெயர்.

* சபரிமலை பொன்னம்பல மேட்டில் மகர சங்கராந்தியன்று தோன்றும் ஜோதியை அப்பச்சிமேடு, பம்பை, பெரியானை வட்டம், புல்மேடு ஆகிய இடங்களில் இருந்தும் தரிசிக்கலாம். புல்மேடு பகுதியில்தான் இந்த ஜோதி நன்றாகத் தெரியும்.

* சபரிமலையில் பக்தர்கள் கொடுக்கும் பொருட்கள், சந்நிதி அருகே வாரம் இருமுறை ஏலம் விடப்படுகிறது. விருப்பம் உள்ளவர்கள் ஏலம் எடுக்கலாம்.

* சபரிமலைக்குள் செல்போனில் பேசத் தடை உள்ளது. எனவே நடைபந்தல் தொடங்கும் முன்பு செல்போன்களை பத்திரமாகக் கொடுத்து விடுவது நல்லது.

* அகில பாரத ஐயப்ப சேவா சங்கம் செய்து வரும் வரும் சேவைகள் காரணமாக லட்சக்கணக்கான பக்தர்கள் பயன் அடைந்து வருகிறார்கள்.

* சபரிமலையில் மஞ்சமாதா கோயில் அருகில் தபால் நிலையம் உள்ளது. அங்குள்ள தபால்களில் 18 படி தபால்முத்திரை பதிக்கப்படும்.

* சபரிமலையில் விழாக்காலங்களில் சட்டம்-ஒழுங்கை பாதுகாக்க நீதிபதி ஒருவரை, கேரளா ஐகோர்ட்டு நியமனம் செய்யும். இந்த நீதிபதிக்கு எல்லா அதிகாரமும் வழங்கப்படும்.

* சபரிமலை நடைபந்தல் அருகே தனியார் நிறுவனம் ஆஸ்பத்திரி கட்டிக் கொடுத்துள்ளது. மண்டல பூஜை நாட்களில் ஏராளமான டாக்டர்கள் இங்கு வந்து சேவை செய்வது குறிப்பிடத்தக்கது.

* சபரிமலையில் எல்லா இடங்களிலும் தண்ணீர் குடிக்காதீர்கள். தேவஸ்தானம் தரும் சுக்குத் தண்ணீர் வாங்கிக் குடிப்பது நல்லது.

* சபரிமலையில் தினமும் அதிகாலை 3 மணிக்கு கோயில் திறந்ததும் சுப்ரபாதம் பாடப்படுவது வழக்கம்.

* நடிகர் எம்.என்.நம்பியார் சபரிமலை தேவஸ்தானம் அனுமதி பெற்று பல கட்டிடங்கள் கட்டினார். அதன் பிறகே சபரிமலை சந்நிதானம் பக்தர்களுக்கு வசதி கிடைப்பதற்கு உரிய வகையில் மாற்றங்கள் நிகழ்ந்தன.

* கேரள கவர்னராக இருந்த பி.வி.கிரி நடந்து மலையேற இயலாத நிலையில் இருந்ததால் அவரை ஒரு பிரம்பு நாற்காலியில் உட்கார வைத்து தூக்கிக் கொண்டு, சந்நிதானத்து வந்தனர். அதன்பிறகே பிரம்பு நாற்காலி-கம்பு கட்டிய டோலி முறை நடைமுறைக்கு வந்ததாகச் சொல்கிறார்கள் சிலர்.

* ஐயப்பனுக்கு தினமும் இரவு 8 மணிக்கு புஷ்பாஞ்சலி நடத்தப்படும். பக்தர்களே பூக்களைக் கூடையில் எடுத்து வந்து கொடுக்கலாம்.

* ஐயப்பனுக்கு விபூதி, சந்தனம், பால், பன்னீர், 108 ஒரு ரூபாய் நாணயம், தேன், பஞ்சாமிர்தம், இளநீர் ஆகிய எட்டும் கொண்டு செய்யப்படும் அபிஷேகத்துக்கு அஷ்டாபிஷேகம் என்று பெயர்.