‘செம்பி’ முதல் ‘ராங்கி’ வரை - தியேட்டர், ஓடிடியில் இந்த வாரம் என்ன பார்க்கலாம்?

இந்த வாரம் ஓடிடி மற்றும் திரையரங்குகளில் என்னென்ன புதுப் படங்கள் வெளியாகின்றன என்பது குறித்து ஒரு விரைவு முன்னோட்டத்தைப் பார்ப்போம். திரைப்படங்கள் மட்டுமல்லாமல், எந்தெந்த வெப் சீரிஸ்கள் வெளியாகின்றன என்பதையும் அறிவோம்.

தியேட்டர் ரிலீஸ்: ஆண்டின் இறுதி வாரமான இந்த வாரம் முக்கியமான தமிழ் படங்கள் வெளியாகின்றன. அதன்படி பிரபு சாலமன் இயக்கத்தில் கோவை சரளா நடித்துள்ள ‘செம்பி’ படம் நாளை (டிசம்பர் 30) திரையரங்குகளில் வெளியாகிறது. ஐஸ்வர்யா ராஜேஷ் நடித்துள்ள ‘டிரைவர் ஜமுனா’, த்ரிஷா நடித்துள்ள ‘ராங்கி’ படங்களும் நாளை வெளியிடப்பட உள்ளன. தவிர, சன்னி லியோன், சதீஷ் நடித்துள்ள ‘ஓ மை கோஸ்ட்’ படமும் நாளை வெளியாகிறது. ஆதி சசிகுமார், ரியா சுமன் நடித்துள்ள ‘டாப் கியர்’ தெலுங்கு படத்தையும், ஷைன் டாம் சாக்கோ, ஷோபின் சாயிர், மீரா ஜாஸ்மின் நடித்துள்ள ‘டிஜின்’ மலையாள படத்தையும் நாளை திரையரங்குகளில் காணலாம்.

நேரடி ஓடிடி ரிலீஸ்: அறிமுக இயக்குநர் கார்த்திக் ஸ்ரீனிவாசன் இயக்கத்தில் லிங்கா, காயத்ரி, விவேக் பிரசன்னா நடித்துள்ள ‘உடன்பால்’ திரைப்படம் ஆஹா ஓடிடி தளத்தில் நேரடியாக வெளியாகிறது. அனுபமா பரமேஸ்வரன் நடிப்பில் உருவாகியுள்ள ‘பட்டர்ஃப்ளை’ (Butterfly) டிஸ்னி ப்ளஸ் ஹாட்ஸ்டாரில் தற்போது காணக்கிடைக்கிறது.

திரையரங்குகளுக்கு பிறகான ஓடிடி ரிலீஸ்: அதர்வா, ராஜ்கிரண் முன்னணி கதாபாத்திரத்தில் நடித்துள்ள ‘பட்டத்து அரசன்’ டிசம்பர் 28-ம் தேதியே நெட்ஃப்ளிக்ஸில் வெளியானது. அல்போன்ஸ் புத்திரன் இயக்கத்தில் பிரித்விராஜ் நடித்துள்ள ‘கோல்டு’ மலையாளப் படத்தை அமேசான் ப்ரைமில் தற்போது காண முடியும். பொன்ராம் இயக்கத்தில் விஜய் சேதுபதி நடித்துள்ள ‘டிஎஸ்பி’ படம் நாளை நெட்ஃப்ளிக்ஸ் தளத்தில் வெளியாகிறது. ஹுமா குரேஷி, சோனாக்‌ஷிஷி சின்ஹா நடித்துள்ள ‘டபுள் எக்ஸல்’ இந்தி திரைப்படம் நெட்ஃப்ளிக்ஸில் காணக் கிடைக்கிறது.