‘ஸ்குவிட் கேம் சீசன் 2’ ட்ரெய்லர் எப்படி? - பணம், பயம், பரபரப்பு!

சென்னை: ‘ஸ்குவிட் கேம் சீசன் 2’ இணையத் தொடரின் ட்ரெய்லர் வெளியாகி ரசிகர்களின் கவனத்தை ஈர்த்துள்ளது. ட்ரெய்லர் எப்படி? - மீண்டும் என்னை அந்த விளையாட்டில் அழைத்துச் செல்லுங்கள் என கேட்கிறார் சியோங் கி ஹுன். மீண்டும் அந்த விபரீதமான விளையாட்டுக்குள் ஒரு கூட்டம் நுழைகிறது. “நாங்கள் உங்களை எதுவும் செய்ய மாட்டோம். இது உங்களுக்கான வாய்ப்பு” அந்த பாதுகாவலர்கள் தெரிவிக்கின்றனர். முதல் விளையாட்டு தொடங்குகிறது. முந்தைய பாகத்தில் இருந்ததை போல, கொடுக்கும் நேரத்தில் முன்னேற வேண்டும்.

தவிர்த்து, ராட்சத பொம்மை பார்க்கும்போது அசைபவர்கள் கொல்லப்படுகிறார்கள். ரத்தம் தெறிக்கிறது. மறுபுறம் உண்டியலில் பணம் கொடுக்கப்படுகிறது. “இதில் நான் வென்றுவிட்டால் என்னுடைய அனைத்து கடனையும் அடைத்துவிடுவேன்” என்கிறார் விளையாட்டில் பங்கேற்கும் ஒருவர். விளையாட்டில் பங்கேற்பவர்களிடையே மோதல், உயிர் போதல் என விறுவிறுப்பாக நகரும் ட்ரெய்லரில் எதிர்த்து களமாட முடிவு செய்கிறார் நயாகன் சியோங். “இந்த விளையாட்டை யார் உருவாக்கினார்கள், அவர்களை எதிர்த்து போராட வேண்டும்” என்கிறார். பயம், எதிர்ப்பு, தைரியம், விறுவிறுப்பு என ஆர்வமூட்டுகிறது ட்ரெய்லர்.

ஸ்குவிட் கேம் 2: கடந்த 2021-ம் ஆண்டு செப்டம்பர் மாதம் 17-ம் தேதி நெட்ஃபிளிக்ஸ் ஓடிடி தளத்தில் வெளியானது தென்கொரிய இணைய தொடரான 'ஸ்குவிட் கேம்'. ஹ்வாங் டாங் - ஹியூக் இயக்கிய இந்த தொடர் குழந்தைகள் விளையாடும் விளையாட்டை மையமாக கொண்டு ஆழமான பல கருத்துகளை உள்ளடக்கி விறுவிறுப்பான திரைக்கதையில் உருவாக்கப்பட்டது. மொத்தம் 9 எபிசோடுகள் கொண்ட இந்தத் தொடர் வெளியான முதல் நான்கு வாரங்களில் 1.65 பில்லியன் பார்வையாளர்களால் கண்டுகளிக்கப்பட்டு பெரும் சாதனை படைத்தது.

நெட்ஃபிளிக்ஸ் ஓடிடியில் அதிக பார்வையாளர்களால் பார்க்கப்பட்ட இணையத் தொடர் என்ற பெருமையையும் 'ஸ்குவிட் கேம்' பெற்றிருந்தது. இந்தத் தொடரின் அடுத்த சீசன் எப்போது வெளியாகும் என ரசிகர்கள் காத்துக்கொண்டிருந்தனர். இந்நிலையில், இந்தத் தொடரின் இரண்டாம் சீசன் வரும் டிசம்பர் 26-ம் தேதி வெளியாகும் என நெட்ஃப்ளிக்ஸ் ஓடிடி நிறுவனம் அதிகாரபூர்வமாக அறிவித்துள்ளது. இதன் 3ஆவது மற்றும் இறுதி சீசன் வரும் 2025-ம் ஆண்டு வெளியாகும் என தெரிவிக்கப்பட்டுள்ளது. ட்ரெய்லர் வீடியோ: