முக்கியச் செய்திகளும் முன்னாள் மஞ்சள் வண்ணத்துப்பூச்சியும்

எல்லா முக்கியச் செய்திகளுக்கும்

அப்பால் தனித்துப் பறந்துகொண்டிருக்கிறது

இந்த மஞ்சள் வண்ணத்துப்பூச்சி

*

முக்கியச் செய்தி தேடியும்

முக்கியச் செய்தி ஆகவும்

விரையும் வாகனங்களுக்கிடையில்

ஏதுமறியாத

தான்தோன்றித்தனமான பறத்தல்

*

சாலையைக் கடந்திருந்தால்

தனக்குத் தானே

ஒரு முக்கியச் செய்தியாக

அது ஆகியிருந்திருக்கலாம்

*

அதற்குள்ளாக

விரைந்துவரும் முக்கியச் செய்தியொன்றின்

முகப்புக் கண்ணாடியில் மோதல்கொண்டு

சிதைந்து வழிகிறது

பறவையின் எச்சம்போல்

*

ஒரு நொடிதான்

அப்புறம்

ஒரே வீச்சில்

இருந்த தடம் தெரியாமல்

துடைத்துப் போடுகிறது

ஒரு துடைப்பான்

முன்னாள் மஞ்சள் வண்ணத்துப்பூச்சியை

*

விட்டிருந்தால் காற்றே

துடைத்துப்போட்டிருக்கும்

இல்லையென்றால் அடுத்த சிக்னலில்

ஒரு பிச்சைச் சிறுமி

துடைத்துவிட்டு

கார் கண்ணாடியைத் தட்டியிருப்பாள்

*

ஒரு முன்னாள் மஞ்சள் வண்ணத்துப்பூச்சிக்கு

அவ்வளவு முக்கியத்துவம் தந்திருக்க

வேண்டியதில்லைதான்

ஒரு இன்னாள் துடைப்பான்!