இப்படிக்கு இவர்கள்: கரும்பு விவசாயிகளை வஞ்சிக்கும் செயல்!

ரும்புக்கு, இந்த ஆண்டுக்கான பருவத்துக்கு மாநில அரசின் பரிந்துரை விலையை அறிவிப்புசெய்யாமல், சென்ற ஆண்டின் எஸ்ஏபி விலையான ரூ. 2,750-ஐ, இந்த ஆண்டுக்கான எஃப்ஆர்பி ரூ. 2,550 போக மீதியுள்ள ரூ. 200-ஐ விவசாயிகளுக்கு நேரடியாக வழங்க ஒதுக்கியதாக அறிவிக்கப்பட்டுள்ளது. ஆனால், கடந்த 2013 முதல் 17 வரையிலான நான்கு பருவத்துக்கும் சேர்த்துச் சேர வேண்டிய ரூ. 2,000 கோடிக்கான அறிவிப்பு ஏதும் செய்யாமலும், இனி வரும் பருவங்களுக்கும் ரங்கராஜன் குழு பரிந்துரையில் மாற்றம்செய்யாமல் விலை நிர்ணயிப்பதும் கரும்பு விவசாயிகளை வஞ்சிக்கும் செயல்தானே. மேலும், கரும்பு விவசாயிகளிடையே சிறு, குறு, பெரு விவசாயிகள் என்று பாகுபாடு பார்க்காமல், முழு மானியத்தில் சொட்டுநீர்ப் பாசனம், புதிய ரகக் கரும்பு நாற்றுகளை மாநில அரசே வழங்குதல், விவசாயிகளின் கடன் தள்ளுபடி, உச்ச நீதிமன்ற ஆணைப்படி காவிரி மேலாண்மை வாரியம், வேளாண் விளைபொருட்களுக்கு எம்.எஸ்.சாமிநாதன் குழு பரிந்துரையான C2+50% சூத்திரப் படி கொள்முதல் விலையை நிர்ணயம் செய்ய மத்திய அரசுக்கு அழுத்தம்கொடுக்கும் வகையில், இந்த பட்ஜெட்டில் அறிவிப்புகள் ஏதும் இல்லாதது.. வெந்த புண்ணில் வேல் பாய்ச்சுவது போலாகும்! மகாராஷ்டிர விவசாயிகள் திரண்டெழுந்து, மும்பையில் மிகப் பெரிய பேரணியாகச் சென்று, தங்களின் நியாயமான கோரிக்கைகளை அம்மாநில அரசுக்குப் புரியவைத்தார்கள். அந்நிலை தமிழ்நாட்டிலும் ஏற்படாதவாறு அரசு நடந்துகொள்ள வேண்டும் என விரும்புகிறோம்.