இப்படிக்கு இவர்கள்: மாற்று வழிகளையும் சிந்தித்திடுக

விரி பிரச்சினை தொடர்பாக, ஒருபுறம் உரிமைக்குப் போராடுகையில், மறுபுறம் மாற்று வழிகள் பற்றிச் சிந்தித்துச் செயலாற்றுவதும் அவசியம். காவிரியின் நீரோடு பல ஆறுகளின் நீரும் கலக்கின்றன. கர்நாடகத்தில் காவிரியுடன் கலக்கும் ஒவ்வொரு உபநதியிலும் அணைகள் கட்டி தமிழகத்துக்கு வரும் காவிரியின் நீரளவை வெகுவாகக் குறைத்துவிட்டனர். தமிழ்நாட்டிலும் பவானி, அமராவதி மட்டுமின்றி நொய்யலாற்று நீரும் காவிரியோடு கலந்தன. மேட்டூர் தொடங்கி கரூர் வரை பல தொழிற்சாலைகளின் ரசாயனக் கழிவுகள் காவிரியில் கலந்து நஞ்சாக்குகின்றன. இம்மூன்று ஆறுகளைத் தூய்மைப்படுத்துவது நற்பயனை விளைவிக்கும். நீர் விற்பன்னர்களின் துணையோடு நம் நீராதாரங்களை மேம்படுத்துவது பற்றிச் சிந்தித்துச் செயல்பட வேண்டும்.

ப்ரல் 3 அன்று வெளியான ‘மாற்று சித்தாந்தங்களை முன்வைக்கத் தவறும் காங்கிரஸ்!’ கட்டுரையைப் படித்தேன். எதிர்க்கட்சிகள் பலமாக இல்லாததே இப்போதைய ஆட்சியாளர்களின் பலம் என்பதை காங்கிரஸ் தலைவர்கள் உணர வேண்டும். விளிம்புநிலை மக்களுக்குக் கட்சியின் அதிகார அமைப்பில் இடமளிப்பதில் ராகுல் உறுதியாக இருக்க வேண்டும். நெருக்கடியான நிலையில் கடுமையான போராட்ட குணம் ராகுலுக்குத் தற்போது தேவை. காங்கிரஸைப் புதுப்பித்தல் என்பதை மனதில்கொள்ளும் அதேநேரத்தில் முந்தைய தலைவர்களின் ஆளுமை பற்றியும் தெரிந்துவைத்திருக்க வேண்டும்.

விழிப்புணர்வுக் கட்டுரை

ப்ரல் 2 அன்று வெளியான 'முற்றிலும் குணமாகக்கூடியதா ஆட்டிசம்' கட்டுரையைப் படித்து நெகிழ்ந்தேன். மாற்றுத் திறனுடைய குழந்தைகள், பெற்றோர்களை விளம்பரத்தின் வாயிலாக ஏமாற்றுபவர்களைப் பற்றிய விழிப்புணர்வு கருத்துக்களைக் கொண்ட கட்டுரை அது. மூளைச் செயல்பாட்டுக் குறைவால், நரம்பியல் சார்ந்த வளர்ச்சிக் குறைபாடுகள் ஏற்பட்டு அதனால் இயல்பான மனிதர்களாகச் சிந்திக்க இயலாத ஆட்டிசத்தை முற்றிலும் குணப்படுத்த உரிய மருந்து இன்னும் கண்டுபிடிக்கப்படாத நிலை நன்கு விளக்கப்பட்டிருந்தது. பெற்றோர்களின் விவரிக்க இயலாத மன உளைச்சலுக்கு மனிதநேய மருந்திடுதல் மிகவும் அவசியம்.