இப்படிக்கு இவர்கள்: பாகிஸ்தானின் நடவடிக்கை மனிதாபிமானமற்றது!

கிஸ்தானில் மரண தண்டனை விதிக்கப்பட்ட, முன்னாள் இந்தியக் கடற்படை அதிகாரி குல்பூஷண் ஜாதவை அவரது மனைவியும் தாயும் சந்திக்க ஒப்புக்கொண்டாலும், அவர்கள் அவரைச் சந்தித்தபோது, அவர்கள் அணிந்திருந்த தாலி, வளையல்கள், பொட்டு ஆகியவற்றை அகற்ற வேண்டும் என பாகிஸ்தான் விதித்த கட்டுப்பாடுகள் மனிதாபிமானமற்றவை; கடுமையாகக் கண்டிக்கத் தக்கவை. மரணத்தில் இருப்பவரைக் கட்டித் தழுவி, கண்ணீர் விட்டுத் தங்கள் அன்பையும், ஆதங்கத்தையும் வெளிப்படுத்த தாயும் மனைவியும் எண்ணியிருக்கக்கூடும்; மனித இயல்பும்கூட! ஆனால், அதற்கு வழியில்லாமல், ஜாதவ் இருந்ததோ கண்ணாடித் திரைக்குப் பின். உற்ற உறவுகளின் நுண்ணுணர்வுகளை மதிக்கத் தெரியாத பாகிஸ்தான் திருந்துவது எப்போது?

சம்பர் 28 அன்று வெளியான ‘மார்ட்டின் லூதர் எனும் மதச் சீர்திருத்தவாதி’ எனும் கட்டுரை படித்தேன். விவிலியத்தையும் புதிய ஏற்பாட்டையும் லத்தீன் மொழியிலிருந்து ஜெர்மன் மொழியில் மொழி பெயர்த்து, சாதாரண மக்களையும் சென்றடைய வழிகண்டார். மாற்றங்களை எங்கு மேற்கொள்ள முயற்சித்தாலும், அங்கே எதிர்ப்புகள் மிக மோசமாக இருக்கும் என்பதையே மார்ட்டின் லூதருக்கு விதிக்கப்பட்ட மரண தண்டனை நமக்கு உணர்த்துகிறது. இருப்பினும், அவர் சீர்திருத்தத்தைக் கைவிடாது உறுதியாக இருந்ததிலிருந்தே அங்கு எந்த அளவுக்குச் சீர்திருத்தம் தேவையாக இருந்திருக்கிறது என்பதையும் நம்மால் உணர முடிகிறது. இடைவிடாத போராட்டங்களும், போராளிகளின் மன உறுதியுமே எதிர்காலச் சமுதாயக் கட்டமைப்பினைச் சீர்திருத்தி மாற்றத்தைக் கொண்டுவர முடியும்; அதுதான் உண்மையும்கூட!

லகமயம், தாராளமயம், தனியார்மயம் என்ற கோட்பாடுகளை எல்லாம்விட, ஆதார்மயம் முந்திவிடும் அளவுக்கு எங்கும் ஆதார், எதிலும் ஆதார் என்ற நிலையைக் கொண்டுவந்துவிட்டது, பாஜக தலைமையிலான அரசு. முகநூல் கணக்கு துவங்க ஆதார் தேவை என்ற நடவடிக்கை, உலக அளவில் ஆதாரை முன்னிறுத்தும் ஒரு முயற்சியாக இருக்குமே தவிர, இணையதளப் பாதுகாப்புக்கு வழிவகுக்காது. இணையதளம் வாயிலாக ஆன்லைன், ஏடிஎம் மோசடி என்று எவ்வளவோ சைபர் குற்றங்களைத் தடுக்க இயலாத கையறு நிலையில் இருக்கும் நாம், முகநூலின் பாதுகாப்புக்கு ஆதாரை நாடுவது தேவைதானா? மாறிவரும் தொழில் நுட்பத்துக்கேற்ப இந்தியத் தகவல் தொழில்நுட்பச் சட்டத்தை மாற்றியமைக்காத நிலையில், இது வீணான முயற்சியே. ஏற்கெனவே ஆதார் தகவல்கள் கசிந்த நிலையில், இனி நம் முகநூல் பக்கங்களின் அந்தரங்கங்களும் கசியாது என்பதற்கு என்ன உத்தரவாதம்?