நாட்டின் பதினேழாவது மக்களவையின் 12ஆவது கூட்டத்தொடராக, நாடாளுமன்ற மழைக்காலக் கூட்டத்தொடர் நேற்று (ஜூலை 20) தொடங்கியிருக்கிறது. பழைய நாடாளுமன்றக் கட்டிடத்தில் தொடங்கிய கூட்டத்தொடர், ஆகஸ்ட் 11 வரை நடைபெறவுள்ளது; 23 நாள்களில் மொத்தம் 17 அமர்வுகளாக நடைபெறவுள்ள கூட்டத்தொடர், புதிய நாடாளுமன்றக் கட்டிடத்தில் நிறைவடையும் என எதிர்பார்க்கப்படுகிறது.

அதானி குழுமம் பற்றி வெளியான ஹிண்டன்பர்க் அறிக்கை, கடந்த பட்ஜெட் கூட்டத்தொடரில் முக்கிய விவாதப் பொருளானது. இந்த விவகாரத்தை நாடாளுமன்றக் கூட்டுக் குழு விசாரிக்க வேண்டும் என எதிர்க்கட்சிஎம்.பி.க்கள் தொடர்ந்து குரலெழுப்பினர். அவதூறு வழக்கில் குற்றவாளி எனத் தீர்ப்பளிக்கப்பட்ட ராகுல் காந்தி தனது எம்.பி. பதவியை இழந்ததும், அந்தக் கூட்டத்தொடரின்போதுதான் நடந்தது.