அன்றாடச் சமையலில் முக்கியப் பொருளான தக்காளி, சில்லறை விற்பனைக் கடைகளில் ரூ.100ஐத் தாண்டி விற்பனையாகிக் கொண்டிருக்கிறது; தலைநகர் டெல்லியில் ரூ.200ஐத் தொட்டுவிட்டது. தக்காளி மட்டுமல்லாமல் சின்ன வெங்காயம், இஞ்சி, பச்சைமிளகாய், பீன்ஸ் உள்படப் பல காய்கறிகளும் கடும் விலையேற்றம் கண்டுள்ளன. இது அனைத்துத் தரப்பு மக்களின் வாங்கும் சக்தியில் பெரும் பாதிப்பை ஏற்படுத்தியிருக்கிறது.

தக்காளி, வெங்காயம் போன்ற முக்கியமான காய்கறிகள் ஆண்டுதோறும் நிலையான விலையைக் கொண்டிருப்பதில்லை. பருவமழை பாதிப்பு, விளைச்சல் குறைவு, வரத்துக் குறைவு எனப் பல்வேறு காரணங்களால் விலையில் மாற்றங்கள் நிகழ்வது வாடிக்கைதான். 2022 ஜூலையில், சென்னையில் ஒரு கிலோ தக்காளியின் விலை ரூ.15; 2023 ஜூலையில் அது ரூ.120 ஆக உயர்ந்திருக்கிறது.