ப்ரீமியம்
பாரதி நினைவு நாள் | நவீனத் தமிழ் இலக்கியத்தின் தந்தை

பாரதிக்கு மகாகவி, முண்டாசுக் கவிஞர் எனச் சிறப்புப் பெயர்கள் பல உண்டு. அவரைக் குறித்த திரைப்படமும் கதைகளும் தெய்விகக் கதைகளுக்கு நிகரான அற்புதம் கொண்டவை. ஆனால், பாரதியின் இலக்கியச் செயற்பாடு புதிய தலைமுறையினரால் சரியாகக் கவனிக்கப்பட்டதா என்பது கேள்விக்குரியதுதான். பாரதியின் பங்களிப்பை பத்தோடு பதினொன்றாகப் பட்டியலுக்குள் அடைத்துவிட முடியாது. நவீனத் தமிழ் இலக்கியத்தின் முன்னோடி எனப் பாரதியை முன்னிறுத்துவது சாலப் பொருந்தும்.

‘மெல்லத் தமிழ் இனிச் சாகும்’ எனப் பாரதி தன் கவிதையில் சொல்வதிலிருந்து தமிழை நவீனப்படுத்துவது குறித்த அவரது விருப்பத்தை அறிந்துகொள்ள முடியும். இந்தக் கவிதையின் தொடர்ச்சியில் அவர் ‘அந்த மேற்கு மொழிகள் புவிமிசை ஓங்கும்’ என்கிறார். மேற்குலக இலக்கியத்தில் மேற்கொள்ளப்படும் புதிய முயற்சிகளைத் தொடர்ந்து கவனித்துவந்த பாரதி, அம்மாதிரியான முயற்சிகள் தமிழில் இல்லை என்கிற கவலையை இந்தக் கவிதையில் வெளிப்படுத்தியிருப்பார். ‘அந்த மேன்மைக் கலைகள் தமிழினில் இல்லை/ சொல்லவும் கூடுவதில்லை/ அவை சொல்லுந் திறமை தமிழ் மொழிக்கில்லை’ என இந்தக் கவிதையின் முன் வரிகளில் மேற்கில் தோன்றிய அறிவியல் சித்தாந்தங்களை உள்வாங்கும் திறனை, தமிழ் வளர்த்துக்கொள்ள வேண்டும் என்பதைச் சொல்லியிருக்கிறார். தமிழ் அறிவியல் கலைக்களஞ்சியத்தின் தேவையை முன்னறிந்து உரைத்திருக்கிறார் என இதைக் கொள்ளலாம்.