அண்ணா முதல் ஓபிஎஸ் வரை | மக்களவைத் தேர்தலில் முன்னாள் முதல்வர்கள்

அண்ணா, ஜெயலலிதா, எடப்பாடி பழனிசாமி என நாடாளுமன்ற உறுப்பினர்கள் முதலமைச்சரான வரலாறு தமிழ்நாட்டில் உண்டு. அண்ணா 1962 இல் தென் சென்னை தொகுதியில் போட்டியிட்டு வென்று மக்களவை உறுப்பினரானார்; 1967இல் முதலமைச்சரானார்.

ஜெயலலிதா 1984-89 வரை மாநிலங்களவை உறுப்பினராக இருந்தவர்; 1991இல் முதலமைச்சரானார். எடப்பாடி பழனிசாமி 1998இல் திருச்செங்கோடு தொகுதியில் வென்று மக்களவை உறுப்பினரானவர்; அவர் 2017இல் தமிழ்நாடு முதலமைச்சரானார்.

முதலமைச்சராக இருந்தவர்கள் நாடாளுமன்றத் தேர்தலில் போட்டியிட்ட நிகழ்வும் நடந்திருக்கிறது. தமிழ்நாட்டில் 1954 முதல் 1963 வரை 9 ஆண்டுகள் முதலமைச்சராக இருந்த காமராஜர் 1969இல் நாகர்கோவில் தொகுதி இடைத்தேர்தலில் வென்று முதல் முறையாக மக்களவை உறுப்பினரானார்.

1971இல் அதே தொகுதியில் போட்டியிட்டு மீண்டும் வென்றார். காமராஜருக்குப் பிறகு - 53 ஆண்டுகளுக்குப் பிறகு - நாடாளுமன்றத் தேர்தலில் போட்டியிடும் முன்னாள் முதலமைச்சரான ஓ.பன்னீர்செல்வம், ராமநாதபுரத்தில் இந்த முறை களம் காண்கிறார்.