தமிழகத்தின் முதல் பொருளாதார அறிக்கை | சொல்... பொருள்... தெளிவு

தமிழ்நாட்டில் முதல் முறையாகப் பொருளாதார ஆய்வறிக்கை வெளியிடப்பட்டிருப்பது தேசிய அளவில் கவனத்தை ஈர்த்திருக்கிறது. 2023இல் உலகப் பொருளாதார வளர்ச்சி 3.33% ஆக இருந்த நிலையில், இந்தியாவின் பொருளாதார வளர்ச்சி 2022-23இல் 7.61% ஆகவும், 2023-24இல் 9.19%, 2024-25இல் 6.48% ஆகவும் பதிவானது.

இதே காலக்கட்டத்தில் வலிமையான பொருளாதாரத் திட்டங்கள் மூலம் 2021 - 22 முதல் தமிழ்நாட்டின் பொருளாதார வளர்ச்சி 8% எனச் சீரான பாதையில் பயணித்து வருகிறது. எனவே, 2024 – 2025 ஆண்டுக்கான பொருளாதார வளர்ச்சி 8%க்கும் அதிகமாக இருக்கும் என அந்த அறிக்கையில் தெரிவிக்கப்பட்டுள்ளது.

மேலும், தமிழ்​நாட்டின் தனிநபர் வருமான வளர்ச்சி பல ஆண்டு​களாகத் தேசிய சராசரியைவிட அதிகமாக உள்ளது எனவும் பொருளாதார ஆய்வறிக்கை சுட்டிக்​காட்​டி​யுள்ளது. 2022-23இல் தமிழகத்தில் தனிநபர் வருமானம் ஆண்டுக்கு ரூ.2.78 லட்சமாக இருந்த நிலையில், தேசிய சராசரி ரூ.1.69 லட்சமாக இருந்தது கவனிக்​கத்​தக்கது. உலகளவில் நிலவிய பொருளாதார சவால்​களுக்கு மத்தியில் தமிழகத்தின் பொருளாதார மீள்தன்மை, முன்மா​திரித் திட்டங்கள், பரவலாக்​கப்பட்ட வளர்ச்சி ஆகியவற்றைப் பற்றி இப்பொருளாதார ஆய்வறிக்கை குறிப்​பிடு​கிறது.

முதல் பொருளாதார ஆய்வறிக்கை: மாநிலத் திட்ட​ ஆணையம் - நிதித் துறை போன்ற பல்வேறு துறைகளின் ஆலோசனையின் கீழ் தமிழகத்தின் முதல் பொருளாதார ஆய்வறிக்கை தயாரிக்​கப்​பட்டு, 2025 மார்ச் 13இல் முதல்வர் ஸ்டாலினிடம் வழங்கப்​பட்டது. இந்த ஆய்வறிக்கை விவசாயம், தொழில் துறை போன்ற முக்கியத் துறைகள் குறித்த விரிவான பகுப்​பாய்வை வழங்கு​வதுடன், பொருளாதார வளர்ச்சி, பணவீக்கம், வேலைவாய்ப்பின் வளர்ச்சிப் போக்கு ஆகியவற்றை ஆராய்​கிறது. தமிழக அரசின் திட்டங்​களையும் செயல்​பாடு​களையும் மதிப்​பிடு​வதுடன், 2024-25, 2025-26ஆம் ஆண்டு​களுக்கான வளர்ச்சி வாய்ப்பு​களை​யும், நிலையான பொருளாதார வளர்ச்சியை அளிப்​ப​தற்கான தீர்வு​களையும் இந்த ஆய்வறிக்கை முன்வைக்​கிறது.

சமமான வளர்ச்சி: இந்திய நிலப்​பரப்பில் வெறும் 4 சதவீதத்தை​யும், மக்கள்​தொகையில் 6 சதவீதத்தையும் கொண்ட தமிழ்​நாடு, 2023-24இல் தேசிய மொத்த உள்நாட்டு உற்பத்​தியில் 9.21% பங்களித்​துள்ளது. தமிழ்​நாட்டின் சமூகக் கொள்கைகள், வலுவான உள்கட்​டமைப்பு வசதிகள், திறன் வாய்ந்த தொழிலாளர் அமைப்புகள் நீடித்த பொருளாதார வளர்ச்சிப் பாதையில் மாநிலத்தை நிலைநிறுத்த உதவியுள்ளன என்பதை இந்த ஆய்வறிக்கை எடுத்​துக்​காட்டு​கிறது.

மகாராஷ்டிரம், கர்நாடகம், மேற்கு வங்கம் போன்ற மாநிலங்​களில் பொருளாதார வளர்ச்சி, உள்கட்​டமைப்பு வசதிகள் ஒரே ஒரு பெருநகர மையத்தைச் சுற்றி மட்டும் குவிந்துள்ளன. ஆனால், தமிழ்​நாட்டின் பொருளாதார வளர்ச்சி என்பது தலைநகர் சென்னையைச் சுற்றி மட்டும் அல்லாமல், பல நகர்ப்புற மையங்​களிலும் சமமாகப் பரவியுள்ளது. கோயம்​புத்​தூர், மதுரை, திருப்​பூர், திருச்சி, சேலம் போன்ற நகரங்கள் தமிழகத்தின் பொருளாதார வளர்ச்சிக்குக் குறிப்​பிடத்தக்க பங்களிப்பை வழங்கு​கின்றன. இதன் மூலம் நகரம் - கிராமம் என்கிற இடைவெளி குறைந்துள்ள​தாகவும் ஆய்வறிக்கை கூறுகிறது.

தமிழக மக்கள்​தொகையில் 31.8% கொண்ட வடக்கு மண்டல மாவட்​டங்கள், மொத்த மாநில உள்நாட்டு உற்பத்​தியில் அதிகபட்சமாக 36.6% பங்களிக்​கின்றன; மக்கள்​தொகையில் 22.8% கொண்ட மேற்கு மண்டல மாவட்​டங்கள், மாநில உள்நாட்டு உற்பத்​தியில் 29.6% வழங்கு​கின்றன. 20.5% மக்கள்தொகை கொண்ட தெற்கு மண்டல மாவட்​டங்கள் 18.8%, 25.5% மக்கள்தொகை கொண்ட கிழக்கு மண்டல மாவட்​டங்கள் 15.1% என மாநில உள்நாட்டு உற்பத்​தியில் அங்கம் வகிக்​கின்றன.

பணவீக்கம்: நாடுகளுக்கு இடையேயான பதற்றம், காலநிலை மாற்றம் போன்ற​வற்றால் சில ஆண்டுகளாக உலகம் முழுவதும் பணவீக்கம் தொடர்​கிறது. உலக நாடுகளின் பணவீக்கம் 2022இல் 8.6%, 2023இல் 6.7% ஆக இருந்தது. இந்தியாவைப் பொறுத்தவரை, சில்லறை விற்பனைப் பணவீக்கம் 2022-23இல் 6.7% ஆகவும், 2023-24இல் 5.4% ஆகவும், 2024-25இல் ஜனவரி 2025 வரை 4.9% ஆகவும் பதிவாகி​யுள்ளது. தமிழ்​நாட்டில் சில்லறை விற்பனைப் பணவீக்கம் 2022-23இல் 6% ஆக இருந்து 2023-24இல் 5.4% ஆகவும், 2024-25இல்​(ஜனவரி 2025 வரை) 4.8% ஆகவும் குறைந்துள்ளது.

இதில் 2019-20 முதல் 2023-24 வரையிலான காலக்​கட்​டத்தில் இந்தியாவின் பணவீக்​கத்தைவிட (சராசரி 4.85%) தமிழகத்தின் பணவீக்கம் (சராசரி 5.7%) அதிகமாகவே இருந்தது. ஆனால், 2020-21இல் இந்தப் போக்கு தலைகீழாக மாறியது. இக்காலக்​கட்​டத்தில் மாநிலத்தின் சில்லறைப் பணவீக்கம் கணிசமாகக் குறையத் தொடங்​கியது. 2023-24இல் இந்தியாவின் 20 முக்கிய மாநிலங்​களில் தமிழ்நாடு மிகக் குறைந்த சில்லறைப் பணவீக்​கத்தைக் கொண்ட 8ஆவது மாநிலமாக அறியப்​படு​கிறது.

நீட் - தேசியக் கல்விக் கொள்கை: தமிழகத்​துக்கு நிதி வழங்கு​வதில் மத்திய அரசு போதிய ஒத்துழைப்பை அளிக்க​வில்லை எனச் சுட்டிக்​காட்​டி​யுள்ள பொருளாதார ஆய்வறிக்கை, தேசியக் கல்விக் கொள்கை (2020), நீட் போன்றவை மாநிலங்​களின் உரிமைகளை நசுக்கு​வ​தாகவும் தெரிவித்​துள்ளது. தேசியக் கல்விக் கொள்கை மாநில சுயாட்சியை நீர்த்​துப்​போகச் செய்வ​தாக​வும், நீட் போன்ற தேர்வுகள் கிராமப்புற மாணவர்​களின் மருத்​துவப் படிப்பு சேர்க்கை விகிதத்தைப் பாதிப்​ப​தாகவும் தெரிவித்​துள்ளது. இதனால், சமூக – பொருளா​தா​ரரீ​தி​யாகப் பின்தங்கிய மாணவர்​களின் பிரதி​நி​தித்துவம் குறைக்​கப்​படு​வ​தாகவும் குற்றம்​சாட்​டி​யுள்ளது.

பொருளா​தாரப் பாதிப்பு: மாநில அரசுகள் நிதிக் கடன் பெறுவதற்கான மத்திய அரசின் கட்டுப்​பாடுகளை இந்தப் பொருளாதார ஆய்வறிக்கை விமர்​சிக்​கிறது. மத்திய அரசு விதித்​துள்ள நிதிக் கடன் கட்டுப்​பாடுகள் தமிழகத்தின் பொருளா​தாரத் திறன் முழுமை​யாகப் பயன்படு​வதைத் தடுப்​ப​தாக​வும், கடன் வரம்புகள் மாநிலத்தின் உள்கட்​டமைப்பு மேம்பாடு, முதலீடுகள், பொருளாதார விரிவாக்​கத்​துக்குப் பாதிப்பை ஏற்படுத்து​வ​தாகவும் அறிக்கை கூறுகிறது.

வேலைவாய்ப்பு​களில்... கல்வித் தகுதி​களுக்கும் - வேலைவாய்ப்புச் சந்தைத் தேவைகளுக்கும் இடையே வேறுபாடு நீடிப்​பதால் இளைஞர்​களிடையே தொழிலாளர் பங்களிப்பு விகிதம் (LFPR) குறைந்துள்ளதாக ஆய்வறிக்கை தெரிவிக்​கிறது. சேவைத் துறையில் நகர்ப்புற வேலைவாய்ப்புகள் சார்ந்து தமிழ்நாடு முன்னணி மாநிலமாக இருந்​தா​லும், தேசியத் தொழிலாளர் கொள்கைகள் வேலைவாய்ப்பு உருவாகும் வேகத்தைக் குறைத்​துள்ள​தாகவும் இந்த ஆய்வின் மூலம் தெரிய​வந்துள்ளது.

மேலும், மத்திய அரசின் கொள்கைகள் தமிழ்​நாட்டின் பொருளா​தாரக் கட்டமைப்​புக்கு ஏற்ப மாற வேண்டும்; இல்லை என்றால், தமிழகத்தில் தொழிலாளர் சந்தை ஏற்றத்​தாழ்வுகள் தீவிர​மாகும் என்றும், இதனால் வேலைவாய்ப்புகள் பாதிக்​கப்​படும் என்றும் அறிக்கை எச்சரிக்​கிறது.

இறுதியாக, உலகளவில் நிலவும் பொருளாதார நிச்சயமற்ற தன்மை, விநியோகச் சங்கிலிப் பாதிப்பு, காலநிலை மாற்ற விளைவுகள் போன்றவை மாநிலத்தின் வளர்ச்சிக்கு இடையூறுகளை ஏற்படுத்து​வ​தாகப் பொருளாதார ஆய்வறிக்கை ஒப்புக்​கொள்​கிறது. அதேநேரத்தில் நிலையான வளர்ச்சி, முதலீடுகள் மூலம் தீர்வுகளை வகுக்க முடியும் எனத் தமிழ்நாடு அரசு உறுதி​கொண்​டுள்ள​தாகவும் இந்த ஆய்​வறிக்கை நம்​பிக்கை அளிக்​கிறது.