அதிவிரைவில் இயங்கும் எலெக்ட்ரான்களைப் படம்பிடிக்கும் வகையில் மிக மிக நுண் கால அளவுகளில் ஒளி சமிக்ஞைகளை உருவாக்கியவர்களுக்கு, 2023ஆம் ஆண்டின் நோபல் இயற்பியல் பரிசு அறிவிக்கப்பட்டுள்ளது. பியர் அகுஸ்தினி (Pierre Agostini), ஃபேரன்ஸ் கிரௌஸ் (Ferenc Krausz), ஆன் லூலியே (Anne L’Huillier) ஆகிய மூவருக்கு இவ்விருது பகிர்ந்தளிக்கப்படுகிறது.

அதிவேக எலெக்ட்ரான் இயக்கம்: மின்விசிறியின் இறக்கைகள் சுழலாமல் இருக்கும்போது தனித்தனியாகத் தெரியும். அதுவே, சுழன்றுகொண்டிருக்கும்போது, தனித்தனி இறக்கைகளாக இல்லாமல், ஒரு தட்டு சுழல்வதுபோலத் தெரியும். ஏனெனில், ஒரு பொருள் வேகமாகச் செல்லும்போது, வெறும் கண்களால் அதைப் பின்தொடர்ந்து தடம் காண இயலாது.