ஹைதராபாத்தில் கனமழைக்கு 7 பேர் உயிரிழப்பு: சாலைகளில் வெள்ளப்பெருக்கு ஏற்பட்டுள்ளதால் பள்ளிகளுக்கு விடுமுறை

ஹைதராபாத்தில் நேற்று முன்தினம் முதல் விட்டுவிட்டு மழை பெய்து வருகிறது. குறிப்பாக திங்கள்கிழமை இரவு பல மணி நேரம் இடைவிடாமல் பெய்த கனமழையால் தாழ்வான பகுதிகளில் வெள்ளம் சூழ்ந்துள்ளது. இதனால் போக்குவரத்து பாதிக்கப்பட்டு, பொதுமக்களின் இயல்பு வாழ்க்கை ஸ்தம்பித்துள்ளது.

ஹைதராபாத்தில் உள்ள ஒரு வீட்டின் சுவர் இடிந்து விழுந்ததில் தந்தையும் 8 மாத ஆண் குழந்தையும் பரிதாபமாக உயிரிழந்தனர். மேலும், அறுந்து விழுந்த மின்சார வயரை மிதித்த 35 வயது மதிக்கத்தக்க ஒருவர் சம்பவ இடத்திலேயே உயிரிழந்தார். இதுதவிர, சங்காரெட்டி மாவட்டத்தில் இடி தாக்கி 4 பேர் பலியாயினர்.

ஹைதராபாத்தில் நேற்று பள்ளிகளுக்கு விடுமுறை அளிக்கப்பட்டது. ஹைதராபாத் உஸ்மானியா பல்கலைக்கழகத்துக்கும் விடுமுறை அறிவிக்கப்பட்டதால், நேற்று நடைபெற இருந்த தேர்வுகள் ஒத்தி வைக்கப்பட்டன.