அடிலாபாத் எம்.பி.யின் வீடு சூறையாடப்பட்டது

அடிலாபாத் எம்.பி. நாகேஷின் வீடு செவ்வாய்க்கிழமை இரவு மர்ம நபர்களால் சூறையாடப்பட்டது. புதன்கிழமை காலையில் வீட்டின் காவலர் கதவு உடைந்திருப்பதைப் பார்த்த பிறகே கொள்ளை சம்பவம் கண்டுபிடிக்கப்பட்டுள்ளது.

அடிலாபாத்தில் உள்ள தங்கள் வீட்டில் இருந்து நாகேஷ் குடும்பத்தினர் டெல்லி சென்றிருந்த நேரத்தில் இந்த சம்பவம் நிகழ்ந்துள்ளது. எம்.பி. நாகேஷைக் குறிவைத்து மேற்கொள்ளப்படும் மூன்றாவது சம்பவம் இதுவாகும்.

இந்த முறை ரூ.15 லட்சம் மதிப்புள்ள நகைகள் திருடு போயுள்ளன. நாகேஷின் குடும்பத்தார் வீடு திரும்பிய பிறகே உண்மையான இழப்பு எவ்வளவு என்ற தகவல் வெளியாகும்.

ஆரம்பகட்ட விசாரணையில் ஒருவர் மட்டுமே கொள்ளையில் ஈடுபட்டிருக்கலாம் என்று தெரியவந்துள்ளது. வீட்டின் அனைத்து இடங்களிலும் சிசிடிவி பொருத்தப்பட்டிருந்த நிலையில், அவை அனைத்தும் சேதமாக்கப்பட்டு, திருட்டு நடைபெற்றுள்ளது.