காஷ்மீரில் லக்‌ஷர் -இ- தொய்பா தீவிரவாதி கைது

தெற்கு காஷ்மீரில் தீவிரவாதிகளுக்கு எதிராக பாதுகாப்புப் படையினர் நடத்திய துப்பாக்கிச் சண்டையின்போது லக்‌ஷர் -இ- தொய்பா அமைப்பின் தீவிரவாதி ஒருவர் கைது செய்யப்பட்டார்.

காஷ்மீரின் அனந்த்நாக் மாவட்டத்தில், சிறப்பு பாதுகாப்புப் படையினரும், ராஷ்ட்ரிய ரைபிள்ஸ் படையினரும் இணைந்து தீவிரவாதிகளுக்கு எதிராக தேடுதல் வேட்டையில் ஈடுபட்டனர்.

இந்தத் தேடுதல் வேட்டையில் அர்வானி கிராமத்தின் அருகே உள்ள பிஜ்பிஹாரா நகரில் தீவிரவாதிகளுக்கும், பாதுகாப்புப் படையினருக்கும் இடையே கடுமையான துப்பாக்கிச் சண்டை நடைப்பெற்றதாக தகவல்கள் தெரிவிக்கின்றன.

இது குறித்து மூத்த போலீஸ் அதிகாரி ஒருவர் கூறும்போது, "பாதுகாப்புப் படையினருக்கும், தீவிரவாதிகளுக்கும், இடையே கடுமையான துப்பாக்கிச் சூடு நடந்தது. இது குறித்து கூடுதல் தகவல்களை தற்போது தெரிவிக்க இயலாது" என்று கூறினார்.

சண்டையின்போது லக்‌ஷர் -இ- தொய்பா அமைப்பின் முக்கிய நபர் கைது செய்யப்பட்டதாக போலீஸார் தரப்பிலிருந்து வரும் தகவல்கள் தெரிவிக்கின்றன.