உஸ்பெகிஸ்தானில் ஷாங்காய் ஒத்துழைப்பு மாநாட்டில் ரஷ்ய அதிபர் புதினை சந்திக்கிறார் பிரதமர் மோடி

புதுடெல்லி: ஷாங்காய் ஒத்துழைப்பு அமைப்பின் மாநாட்டின் போது (எஸ்சிஓ) ரஷ்ய அதிபர் விளாடிமிர் புதினை, பிரதமர் நரேந்திர மோடி சந்தித்துப் பேசவுள்ளார்.

இந்தியா, சீனா, ரஷ்யா, கஜகஸ்தான், கிர்கிஸ்தான், பாகிஸ்தான், தஜிகிஸ்தான், உஸ்பெகிஸ்தான் ஆகிய 8 நாடுகளை கொண்ட ஷாங்காய் ஒத்துழைப்பு அமைப்பின் 22-வது மாநாடு உஸ்பெகிஸ்தானின் சாமர்கண்ட் நகரில் இன்று தொடங்கவுள்ளது. தொடர்ந்து 2 நாட்கள் நடைபெறும் இம்மாநாட்டில் 8 நாடுகளின் தலைவர்கள், அமைச்சர்கள் பங்கேற்கவுள்ளனர்.

உஸ்பெகிஸ்தான் அதிபர் ஷவ்கத் மிர்சியோயேவின் அழைப்பை ஏற்று பிரதமர் மோடி மாநாட்டில் பங்கேற்கிறார். மாநாட்டில் சீன அதிபர் ஜி ஜின்பிங், ரஷ்ய அதிபர் புதின், பாகிஸ்தான் பிரதமர் ஷெபாஸ் ஷெரீப் உள்ளிட்டோரும் பங்கேற்கவுள்ளனர்.

கடந்த 2 ஆண்டுகளாக கரோனா தொற்று காரணமாக ஆன்லைனில் இந்தமாநாடுகள் நடைபெற்றன. இதனால், 2 ஆண்டுகளுக்குப் பிறகு முதல் முறையாக உறுப்பு நாடுகளின் தலைவர்கள் நேரில் சந்திக்க உள்ளனர்.

இந்நிலையில் இந்தியா, ரஷ்யா ஆகிய 2 நாடுகளின் ஒத்துழைப்பு தொடர்பாக, ஷாங்காய் ஒத்துழைப்பு மாநாட்டில் புதின், பிரதமர் மோடி ஆகியோர் சந்தித்துப் பேசவுள்ளனர் என்று ரஷ்ய அதிபர்மாளிகையான கிரெம்ளின் தெரிவித்துள்ளது.

மாநாட்டின் போது இருவரும் 2 நாடுகளிடையிலான ஒத்துழைப்பை அதிகரிப்பது, நல்லுறவை மேம்படுத்து வது தொடர்பாக ஆலோசனை நடத்தவுள்ளனர்.

இதுகுறித்து ரஷ்ய அதிபர் மாளிகை அதிகாரி யூரி உஷாகோவ் அளித்த பேட்டியில் கூறும்போது, “இரு நாட்டு தலைவர்களும் 2 நாடுகளிடையிலான உறவுகளை மேம்படுத்துதல், ஆசிய பசுபிக் பிராந்தியத்தில் உள்ள சூழ்நிலை உள்ளிட்ட பல்வேறு விஷயங்கள் குறித்து ஆலோசிக்கவுள்ளனர்.

ஐ.நா. பாதுகாப்பு கவுன்சிலுக்கு வரும் டிசம்பரில் இந்தியா தலைமையேற்கவுள்ளது. மேலும் 2023-ல்ஜி20 மாநாட்டுக்கும், ஷாங்காய் ஒத்துழைப்பு மாநாட்டுக்கும் இந்தியா தலைமை வகிக்கவுள்ளது. எனவே 2 நாட்டுத் தலைவர்களின் இந்த சந்திப்பு முக்கியத்துவம் பெறுகிறது" என்றார்.

அதே நேரத்தில் சீன அதிபர் ஜி ஜின்பிங், பாகிஸ்தான் பிரதமர் ஷெரீப் ஆகியோருடன் பிரதமர் மோடி ஆலோசனை நடத்தும் திட்டம் இல்லை என்று தெரியவந்துள்ளது.