கார் மீது 2 லாரிகள் மோதி விபத்து: ஒரே குடும்பத்தைச் சேர்ந்த 5 பேர் பலி

தெலங்கானா மாநிலத்தில் நேற்று காலை கார் மீது 2 லாரிகள் மோதி விபத்துக்குள்ளானது. இதில் காரில் பயணம் செய்த ஒரே குடும்பத்தை சேர்ந்த 5 பேர் பரிதாபமாக உயிரிழந்தனர்.

தெலங்கானா மாநிலம், நிஜாமா பாத் மாவட்டம், நிர்மல் பகுதியை சேர்ந்த நிகில் என்பவரை பொறி யியல் கல்லூரியில் சேர்க்க அவரது உறவினர்கள் நேற்று காலை காரில் ஹைதராபாத் புறப்பட்டு சென்றனர். அப்போது, காமாரெட்டி நகர பை-பாஸ் சாலையின் கூட்டு ரோடில் கார் சென்ற போது 2 லாரிகள் கார் மீது மோதின.

இதில் லாரிகளின் சக்கரங்களில் மாட்டிய கார் நொறுங்கியது. இந்த காட்சி அங்குள்ள கண்காணிப்பு கேமராக்களில் பதிவாகி இருந்தது. இந்த விபத்தில் காரில் பயணம் செய்த ஒரு பெண் 2 சிறுவர்கள் உட்பட 5 பேர் சம்பவ இடத்திலேயே பரிதாபமாக உயிரிழந்தனர். தகவல் அறிந்த போலீஸார் சம்பவ இடத்திற்கு விரைந்து சென்று லாரி ஓட்டுநர்களை கைது செய்தனர். இது குறித்து வழக்கு பதிவு செய்து விசாரணை மேற்கொண்டுள்ளனர்.