ஸ்ரீகாளஹஸ்தி சிவன் கோயிலில் தீ விபத்து: 10 கடைகள் எரிந்து நாசம்

ஆந்திராவில் உள்ள பிரசித்தி பெற்ற ஸ்ரீகாளஹஸ்தி சிவன் கோயில் வளாகத்தில் நேற்று முன் தினம் இரவு திடீரென தீ விபத்து ஏற்பட்டது. இதில் 10 கடைகள் முற்றிலும் எரிந்து நாசமானதில் ரூ. 1 கோடி வரை இழப்பு ஏற்பட்டுள்ளதாக கூறப்படுகிறது.

பஞ்ச பூத தலங்களில் வாயு தலமாக விளங்கும் ஸ்ரீ காளஹஸ்தி சிவன் கோயிலில், முகப்பு கோபுர வாசல் அருகே உள்ள வளாகத்தில் 30க்கும் மேற்பட்ட கடைகள் உள்ளன.

நேற்று முன் தினம் இரவு சுமார் 11.30 மணியளவில் இந்த வளாகத்தில் திடீரென தீ விபத்து ஏற்பட்டது. இதைக் கண்டு அதிர்ச்சி அடைந்த பக்தர்களும், கடை வியாபாரிகளும் அலறி ஓடினர். தகவல் அறிந்து விரைந்து வந்த தீயணைப்பு படையினர் பல மணி நேரம் போராடி தீயை அணைத்தனர். எனினும் தீ விபத்தில் 10 கடைகள் முற்றிலும் எரிந்து நாசமானது. இதனால் ரூ. 1 கோடி வரை வியாபாரிகளுக்கு நஷ்டம் ஏற்பட்டிருப்பதாக கூறப்படுகிறது.