திறமையில்லாத கார் மெக்கானிக்: மத்திய அமைச்சர் மீது காங். எம்.பி. சசி தரூர் தாக்கு

திறமையில்லாத கார் மெக்கானிக் போன்று மத்திய அமைச்சர் நிர்மலா சீதாராமன் செயல்படுகிறார் என்று காங்கிரஸ் மூத்த தலைவர் சசிதரூர் தாக்கி பேசியுள்ளார்.

மத்திய பட்ஜெட் குறித்து காங்கிரஸ் மூத்த தலைவரும் எம்.பி.யுமான சசிதரூர் தனது ட்விட்டர் பக்கத்தில் கூறியிருப்பதாவது:

மத்திய அரசின் பட்ஜெட் திருப்தி அளிக்கவில்லை. பட்ஜெட்டில் புதிதாக எதுவும் கூறப்படவில்லை. நாட்டை பாதித்துள்ளபிரச்சினைகளை தீர்ப்பதற்கான எந்த திட்டமும் இல்லை. பொருளாதாரத்தை மேம்படுத்துவதற்கான தடைகளை நீக்குவதற்கு பதிலாகவெறும் அறிவிப்புகளை பாஜகஅரசு பெரிதாகப் பேசி வருகிறது.

திறமையில்லாத கார் மெக்கானிக் ஒருவர் தனது வாடிக்கையாளரிடம், என்னால் உங்கள் காரின்பிரேக்கை சரி செய்ய முடியவில்லை. எனவே, காரின் ஹாரன் சத்தத்தை அதிகமாக வைத்துள்ளேன் என்று கூறுவதைப் போல பாஜக அரசு செயல்படுகிறது.

இவ்வாறு சசிதரூர் தனது ட்விட்டர் பதிவில் கூறியுள்ளார்.

முன்னதாக, பட்ஜெட் தாக்கலுக்கு முன்பு காங்கிரஸ் முன்னாள் தலைவர் ராகுல் காந்தி, தனது ட்விட்டர் பக்கத்தில், “குறு, சிறு மற்றும் நடுத்தர தொழில்கள், விவசாயிகள், தொழிலாளர்களை ஆதரித்து வேலைவாய்ப்பை உருவாக்குங்கள். உயிரைக் காக்க சுகாதாரம் ஆரோக்கியத்துக்கு அதிக நிதி ஒதுக்குங்கள், எல்லைகளைப் பாதுகாக்க ராணுவச் செலவினங்களைக் கூட்டுங்கள்” என்று பதிவிட்டதை சசி தரூர் தனது ட்விட்டர் பக்கத்தில் பகிர்ந்துள்ளார்.