134-வது நிறுவன தினம்- காங்கிரஸார் இன்று பேரணி

காங்கிரஸ் கட்சியின் 134-வது நிறுவன தினம் இன்று கொண்டாடப்படுகிறது. இதை முன்னிட்டு டெல்லியில் உள்ள காங்கிரஸ் தலைமை அலுவலகத்தில் கட்சித் தலைவர் சோனியா காந்தி காங்கிரஸ் கொடியை ஏற்றிவைத்து நிர்வாகிகளுக்கு இனிப்பு வழங்குகிறார். அவரது மகனும் கட்சியின் முன்னாள் தலைவருமான ராகுல் காந்தி, அசாம் மாநிலம் குவாஹாட்டியில் நடக்கும் கூட்டத்தில் கலந்து கொண்டு பேசுகிறார். சோனியா காந்தியின் மகளும் காங்கிரஸ் பொதுச் செயலாளருமான பிரியங்கா காந்தி, உத்தரபிரதேச மாநிலம் லக்னோவில் நடக்கும் கூட்டத்தில் காங்கிரஸ் தொண்டர்களிடையே பேசுகிறார்.

இதுதவிர, மாநில காங்கிரஸ் தலைவர்கள் மாநில கட்சித் தலைமை அலுவலகங்களில் காங்கிரஸ் கொடியேற்றுகின்றனர். மேலும், நாடு முழுவதும் அந்த மாநிலங்களில் காங்கிரஸ் தலைவர்கள் பேரணி நடத்துகின்றனர். குடியுரிமை திருத்த சட்டத்துக்கு எதிர்ப்பு தெரிவிக்கும் வகையில் ‘அரசியல் சட்டத்தைக் காப்போம் - இந்தியாவைக் காப்போம்’ என்ற கோஷத்தை முன்வைத்து இந்தப் பேரணிகள் நடக்கின்றன. பொதுக்கூட்டங்களும் நடத்தப்படுகின்றன. இதை காங்கிரஸ் பொதுச் செயலாளர் கே.சி. வேணுகோபால் நேற்று டெல்லியில் வெளியிட்ட அறிக்கையில் தெரிவித்துள்ளார்.