விபத்தில் 21 ராணுவ வீரர்கள் காயம்

ஜம்மு காஷ்மீர் மாநிலத்தில் உள்ள ரஜவ்ரி மாவட்டத்தில் நேற்று நிகழ்ந்த‌ சாலை விபத்தில் 21 ராணுவ வீரர்கள் காயமடைந்தனர்.

இதுகுறித்து காவல்துறை உயரதிகாரி ஒருவர் கூறும்போது, "21 ராணுவ வீரர்களுடன் ராணுவ வாகனம் ஒன்று ரஜவ்ரி மாவட்டத்தில் எல்லைக் கட்டுப்பாட்டு கோட்டுப் பகுதியில் அமைந்திருக்கும் நவ்ஷேரா பிரிவில் சென்றுகொண்டிருந்தது. அப்போது ஓட்டுநர் வண்டியின் கட்டுப்பாட்டை இழந்ததால், அருகிலிருந்த பள்ளத்தில் விழுந்தது" என்றார்.

இந்த வாகனம் ராஷ்ட்ரிய ரைபிள்ஸ் பிரிவின் 54வது பட்டாலியனைச் சேர்ந்ததாகும்.

காயமடைந்த வீரர்கள் அனைவரும் அருகில் உள்ள மருத்துவமனைக்குக் கொண்டு செல்லப்பட்டனர். அதில் பலத்த காயமடைந்த நான்கு பேருக்கு சிறப்பு சிகிச்சை அளிக்க உதம்பூரில் உள்ள மருத்துவமனைக்குக் கொண்டு செல்ல பரிந்துரைக்கப்பட்டுள்ளது.