கன்டெய்னர் லாரியை கடத்தி ரூ.4 கோடி சிகரெட் கொள்ளை

ஹைதராபாத்தில் மர்ம கும்பல் ஒன்று லாரியை கடத்தி ரூ.4 கோடி மதிப்பிலான சிகரெட்டுகளை கொள்ளையடித்துச் சென்றுள்ளது.

ஹைதராபாத்தில் உள்ள முஷீராபாத் பகுதியில் இருந்து ரூ.4 கோடி மதிப்புள்ள சிகரெட் லோடுடன் கன்டெய்னர் லாரி, நேற்றுமுன்தினம் மாலை திருப்பதிக்கு சென்று கொண்டிருந்தது. அப்போது, அப்துல்லாபூர் பைபாஸ் சாலையில் சிலர் அந்த லாரியை மடக்கினர். ஓட்டுநரை அடித்து உதைத்து கட்டிப் போட்டுள்ளனர்.

பின்னர் லாரியை ஓட்டிச் சென்ற அவர்கள், யாதாத்ரி புவனகிரி மாவட்டம், சவுட்டப்பல் வனப்பகுதியில் ஓட்டுநரை கீழே தள்ளி விட்டுள்ளனர். அதன்பிறகு லாரியை ஒரு மறைவான பகுதியில் நிறுத்தி அதிலிருந்த சிகரெட் பாக்கெட்டுகளை வேறொரு வாகனத்தில் ஏற்றிக் கொண்டு தப்பிச் சென்றுள்ளனர்.

வனப்பகுதியில் இருந்து தப்பி வந்த லாரி ஓட்டுநர், சவுட்டப்பல் போலீஸ் நிலையத்தில் புகார் அளித்தார். அதன் பேரில் போலீஸார் வழக்கு பதிவு செய்து கொள்ளையர்களை தேடி வருகின்றனர்.