ஆந்திரம்: பாலத்திலிருந்து பேருந்து கவிழ்ந்து 11 பேர் பலி

ஆந்திர மாநிலம் கம்மம் அருகே நாயக்கன்கூடம் எனுமிடத்தில் மேம்பாலத்திலிருந்து பேருந்து ஒன்று நிலைதடுமாறி கால்வாயில் விழுந்ததில் 11 பேர் பலியாகினர். 20 பேர் காயமடைந்தனர்.

ஹைதராபாத்திலிருந்து காக்கிநாடா நோக்கி தனியார் பேருந்து ஒன்று சென்று கொண்டிருந்தது. அந்தப் பேருந்தில் 31 பேர் இருந்தனர். அவர்களில் 26 பேர் பயணிகள். 6 பேர் ஓட்டுநர்கள் மற்றும் உதவியாளர்கள்.

பயணிகள் அனைவரும் கிருஷ்ணபுஷ்கரத்தில் புனித நீராடிவிட்டு தங்கள் சொந்த ஊரான சித்தூர் மதனப்பள்ளிக்குச் சென்று கொண்டிருந்தனர்.

அப்போது கம்மம் அருகே நாயக்கன்கூடம் எனும் இடத்தில் மேம்பாலத்தில் செல்லும்போது நிலைதடுமாறி கீழே இருந்த கால்வாயில் விழுந்தது. இதில் பேருந்தில் இருந்த 31 பேரில் 11 பேர் பலியாகினர். 20 பேர் படுகாயங்களுடன் மீட்கப்பட்டு கம்மம் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்.

தகவலறிந்த தெலுங்கானா முதல்வர் சந்திரசேகர ராவ், மீட்புப் பணிகளை விரைந்து நடத்துமாறு உத்தரவிட்டுள்ளார்.