உத்தரப் பிரதேசத்தில் 22 முஸ்லிம்கள் தாய் மதத்துக்கு திரும்பினர்

உத்தரப் பிரதேசத்தின் ஃபைஸாபாத் நகரத்தில் 22 முஸ்லிம்கள் 'கர் வாப்ஸி' மூலம் தாய் மதத்துக்குத் திரும்பினர்.

குழந்தைகள், பெண்கள் உட்பட அம்பேத்கர் நகர் மாவட்டத்தைச் சேர்ந்த 22 முஸ்லிம்கள் இந்து மதத்துக்குத் திரும்பியுள்ளனர்.

அவர்களின் முன்னோர்கள் இந்துக்கள் எனவும், குறிப்பிட்ட சில காரணங்களுக்காக அவர்கள் 20- 25 வருடங்களுக்கு முன்னதாக முஸ்லிம் மதத்தைத் தழுவியதாகவும் கூறப்படுகிறது.

’இந்து மத போதனைகள்’

முறையான சடங்குகள் முடிந்த பிறகு அவர்களுக்கு இந்து மத போதனைகள் வழங்கப்பட்டன.

மதம் மாற்றுதல் தொடர்பான செயல்பாடுகளுக்கு ஆர்எஸ்எஸ் அமைப்பைச் சேர்ந்த கைலாஷ் சந்திர ஸ்ரீவத்சவா தலைமை வகித்தார். அவர் பேசும்போது, ''இஸ்லாம் மதத்தில் இருந்து எந்த ஆதாயத்தையும் எதிர்பார்க்காமல் அவர்கள் இந்து மதத்துக்குத் திரும்பினர்'' என்றார்.

ஆர்ய சமாஜம் கோவிலில் நடைபெற்ற இந்நிகழ்வு கடைசி வரை ரகசியமாக வைக்கப்பட்டிருந்தது குறிப்பிடத்தக்கது.