370-வது பிரிவை மோடியால் நீக்க முடியாது: பரூக் அப்துல்லா

காஷ்மீருக்கு சிறப்பு அந்தஸ்து அளிக்கும் அரசியல் சட்டத்தின் 370-வது பிரிவை, நரேந்திர மோடி 10 முறை பிரதமரானாலும் நீக்க முடியாது என மத்திய அமைச்சர் பரூக் அப்துல்லா தெரிவித்துள்ளார்.

டெல்லியில் சமாஜ்வாதி கட்சி முன்னாள் தலைவர் அமர்சிங் வீட்டில் வைத்து இந்தியா-பாகிஸ்தான் முன்னாள் ராணுவ அதிகாரிகள் கலந்து கொண்ட நிகழ்ச்சி ஒன்று நடைபெற்றது.

அந்நிகழ்ச்சியில் பேரிய பரூக் அப்துல்லா: "370-வது பிரிவு குறித்து விவாதிக்க வேண்டும் என மோடி கூறியிருக்கிறார், ஆனால் பா.ஜ.க இதுவரை எந்த விவாதத்திலும் ஈடுபட்டதில்லை, எனவே 10 முறை பிரதமர் பதவியில் இருந்தாலும் அவர்களால் 370-வது சட்டத்தை ரத்து செய்ய முடியாது". இவ்வாறு அவர் தெரிவித்தார்.

காஷ்மீருக்கு சிறப்பு அந்தஸ்து அளிக்கும் அரசியல் சட்டத்தின் 370-வது பிரிவு, காஷ்மீர் மக்களுக்கு நன்மை அளிக்கிறதா என்பது குறித்து விவாதம் நடத்த வேண்டும் என்று கடந்த ஞாயிற்றுக் கிழமை ஜம்முவில் நடைபெற்ற கூட்டத்தில் குஜராத் முதல்வரும், பாஜக பிரதமர் வேட்பாளருமான நரேந்திர மோடி தெரிவித்திருந்தார்.