நிதிப் பற்றாக்குறை: ராணுவ அதிகாரிகளுக்கு பயணப்படி, அகவிலைப்படி நிறுத்தம்

நிதிப் பற்றாக்குறையால் ராணுவ அதிகாரிகளுக்கு பயணப்படி மற்று அகவிலைப்படியை நிறுத்துவதாக ராணுவ அமைச்சகம் அறிவித்துள்ளது.

இது தொடர்பாக ராணுவ கணக்கு வழக்குகளைப் பராமரிக்கும் அமைப்பான பிசிடிஏ-வின் முதன்மை அதிகாரி  கூறும்போது, "ராணுவ அதிகாரிகளுக்கான நிதியில் பற்றாக்குறை நிலவுவதால் நிதிநிலை சீராகும் வரை பயணப்படி மற்றும் அகவிலைப்படி வழங்க இயலாது" எனத் தெரிவிக்கப்பட்டுள்ளது.

இருப்பினும் விடுமுறை காலத்துக்கான பயணப்படி வழக்கம்போல் வழங்கப்படும் என்று அந்த அறிக்கையில் தெரிவிக்கப்பட்டுள்ளது.

கடந்த 1-ம் தேதி இடைக்கால பட்ஜெட் தாக்கல் செய்யப்பட்டபோது ராணுவத்திற்கு முதன்முறையாக ரூ.3 லட்சம் கோடிக்கு மேல் நிதி ஒதுக்கீடு செய்யப்பட்டுள்ளதாக இடைக்கால நிதியமைச்சர் பியுஷ் கோயல் தெரிவித்திருந்தார்.

ஆனால், மறுபுறம் நிதிப் பற்றாக்குறையால்  ராணுவ அதிகாரிகளுக்கு பயணப்படி, அகவிலைப்படி நிறுத்தப்பட்டிருக்கிறது.