ஸ்ரீநகர் என்கவுன்ட்டரில் இரு தீவிரவாதிகள் சுட்டுக் கொலை; பள்ளி, கல்லூரிகளுக்கு விடுமுறை: இணைய சேவை நிறுத்தம்

காஷ்மீரின் ஸ்ரீநகர் பகுதியில் நடைபெற்ற என்கவுன்ட்டர் தாக்குதலில் இரண்டு தீவிரவாதிகள் இன்று அதிகாலை சுட்டுக்கொலை செய்யப்பட்டனர்.

இதனையடுத்து முன்னெச்சரிக்கை நடவடிக்கையாக பள்ளி, கல்லூரிகளுக்கு விடுமுறை விடப்பட்டுள்ளது. இணைய சேவைகள் தற்காலிகமாக நிறுத்தப்பட்டுள்ளன.

இதுகுறித்து மத்திய காஷ்மீர் டிஐஜி வி.கே.பிர்தி கூறும்போது, ''ஸ்ரீநகரின் சூது கொதைர் பகுதியில் உள்ள ஒரு வீட்டில் தீவிரவாதிகள் பதுங்கியிருப்பதாகப் பாதுகாப்புப் படையினருக்கு ரகசியத் தகவல் கிடைத்தது. இதனையடுத்து நள்ளிரவு 2 மணிக்கு அப்பகுதி சுற்றி வளைக்கப்பட்டது.

மறைந்திருந்த தீவிரவாதிகள் சிறிது நேரத்தில் தாக்குதலைத் தொடங்கினர். இரு தரப்பினருக்கும் இடையேயான சண்டையில் இரண்டு தீவிரவாதிகள் சுட்டுக் கொலை செய்யப்பட்டனர்.

இதனையடுத்து முன்னெச்சரிக்கை நடவடிக்கையாக ஸ்ரீநகர் மாவட்டத்தில் உள்ள பள்ளி, கல்லூரிகளுக்கு விடுமுறை விடப்பட்டுள்ளது. இணைய சேவைகள் தற்காலிகமாக நிறுத்தப்பட்டுள்ளன'' என்று தெரிவித்துள்ளார்.