புதிய வருமான வரி மசோதா மக்களவையில் தாக்கல்

புதுடெல்லி: எதிர்க்கட்சிகளின் கடும் அமளிக்கு இடையே புதிய வருமான வரி மசோதாவை மத்திய நிதி அமைச்சர் நிர்மலா சீதாராமன் நேற்று மக்களவையில் தாக்கல் செய்தார்.

மக்களவையில் வக்பு சட்டத் திருத்த மசோதா தொடர்பான நாடாளுமன்ற கூட்டுக் குழு அறிக்கைக்கு எதிர்ப்பு தெரிவித்து எதிர்க்கட்சிகள் கடும் அமளியில் ஈடுபட்டதால், அவை மதியம் 2 மணி வரை ஒத்திவைக்கப்பட்டது. மீண்டும் அவை கூடியபோது, எதிர்க்கட்சிகளின் கூச்சல், குழப்பத்துக்கு இடையே புதிய வருமான வரி மசோதாவை நிதி அமைச்சர் நிர்மலா சீதாராமன் தாக்கல் செய்தார். எதிர்க்கட்சி உறுப்பினர்கள் இதற்கு அறிமுக நிலையிலேயே எதிர்ப்பு தெரிவித்தனர். ஆனால், குரல் வாக்கெடுப்பு மூலம் இந்த மசோதாவை தாக்கல் செய்யும் தீர்மானம் நிறைவேற்றப்பட்டதாக அறிவிக்கப்பட்டது.

இந்த மசோதா தொடர்பாக எதிர்க்கட்சி உறுப்பினர்கள் பல்வேறு சந்தேகங்கள், கேள்விகள் எழுப்பினர். இதையடுத்து, இந்த மசோதாவை மக்களவை தேர்வு குழுவின் பரிசீலனைக்கு அனுப்புமாறு சபாநாயகர் ஓம் பிர்லாவிடம் நிர்மலா சீதாராமன் கேட்டுக் கொண்டார். பட்ஜெட் கூட்டத் தொடரின் முதல் அமர்வு நேற்றுடன் முடிவடைந்தது. 2-ம் கட்ட கூட்டத் தொடர் மார்ச் 10-ம் தேதி தொடங்க உள்ளது. அதுவரை மக்களவை ஒத்திவைக்கப்படுவதாக அறிவிக்கப்பட்டது. இந்த சூழலில், புதிய வருமான வரி சட்ட மசோதாவை மக்களவை தேர்வு குழு முழுமையாக ஆய்வு செய்யும். தேவைப்படும் பட்சத்தில் அதில் உரிய மாற்றங்களை செய்து, இதுதொடர்பான அறிக்கையை மக்களவையில் மார்ச் 10-ம் தேதி தாக்கல் செய்யும்.

நிதி அமைச்சர் நிர்மலா சீதாராமன் வெளியிட்ட எக்ஸ் பதிவில், ‘எம்.பி.க்கள் சொல்லும் கருத்து சரியல்ல. தற்போதைய பழைய வருமான வரி (ஐ.டி.) சட்டத்தில் 800-க்கும் மேற்பட்ட பிரிவுகள் உள்ளன. தற்போது முன்மொழியப்பட்ட சட்டத்தில் 536 பிரிவுகள். 622 பக்கங்கள், 16 அட்டவணைகள் மட்டுமே உள்ளன. இது எளிதாக இருக்கும்’ என்று தெரிவித்துள்ளார்.

1961-ம் ஆண்டு பழைய வருமான வரி சட்டத்தை மாற்றுவதை இலக்காக கொண்டு புதிய மசோதா கொண்டுவரப்பட்டுள்ளது. இது 2026 ஏப்ரல் முதல் அமலுக்கு வரும் என தெரிகிறது. 60 ஆண்டுகளாக வருமான வரி சட்டத்தில் இருக்கும் ‘முந்தைய ஆண்டு’ என்ற சொல் நீக்கப்பட்டு, அதற்கு பதிலாக ‘வரி ஆண்டு’ என்பது சேர்க்கப்பட்டுள்ளது. ‘மதிப்பீட்டு ஆண்டு’ என்ற சொல்லும் நீக்கப்பட்டுள்ளது.