நடிகை ரோஜா வீட்டில் ரூ. 10 லட்சம் மதிப்பு நகைகள் கொள்ளை: போலீஸார் விசாரணை

நடிகையும் ஆந்திரா சட்டப்பேரவை உறுப்பினருமான ரோஜா வின் ஹைதராபாத் வீட்டில் நேற்று ரூ. 10 லட்சம் மதிப்புள்ள நகை திருடுபோனது. இது குறித்து ரோஜா கொடுத்த புகாரின்பேரில் போலீஸார் வழக்கு பதிந்து விசாரணை நடத்தி வருகின்றனர்.

ஒய்.எஸ்.ஆர். காங்கிரஸ் கட்சியின் மாநில மகளிர் அணி தலைவியும், நகரி சட்டமன்ற உறுப்பினருமான நடிகை ரோஜா, ஹைதராபாத்தில் உள்ள மணி கொண்டா பகுதியில் வசித்து வருகிறார். இந்நிலையில், சில நாட்களாக இந்த வீடு பூட்டி வைக்கப்பட்டிருந்தது. இதனிடையே நேற்று அந்த வீட்டிற்கு சென்ற ரோஜா, பீரோவின் கதவு திறந்திருந்ததை பார்த்து அதிர்ச்சி அடைந்தார்.

அதன் பின்னர் அவர் அந்த பீரோவில் இருந்த ரூ. 10 லட்சம் மதிப்புள்ள தங்க ஹாரம் திருடு போயிருந்ததை அறிந்து மாதப்பூர் போலீஸ் நிலையத்தில் நேற்று மாலை புகார் அளித்தார். அதன்பேரில் போலீஸார் வழக்கு பதிந்து, வீட்டில் பணிபுரிவோரிடம் விசாரணை நடத்தி வருகின்றனர்.