தெலங்கானாவில் ஹெலிகாப்டர் விபத்து: இரு பெண் விமானிகள் உயிர் தப்பினர்

தெலங்கானா மாநிலம், சித்திப்பேட்டை மாவட்டத்தில் நேற்று மதியம் பயிற்சி ஹெலிகாப்டர் ஒன்று வானில் தீப்பற்றி எரிந்து விழுந்தது. இதில் இரு பெண் விமானிகள் பாராசூட் மூலம் குதித்து உயிர் தப்பினர்.

ஹைதராபாத் ஹக்கீம்பேட்டையில் உள்ள விமானப் படை பயிற்சி மையத்தில் இருந்து இந்த ஹெலிகாப்டர் புறப்பட்டது. வழக்கமான பயிற்சியில் ஈடுபடுவதற்கான இந்த ஹெலிகாப்டரை இரு பெண் விமானிகள் இயக்கினர். இந்நிலையில் தெலங்கானா மாநிலம், சித்திப்பேட்டை மாவட்டம், நாகுலபண்டா என்ற இடத்தில் ஹெலிகாப்டர் திடீரென தீப்பற்றி எரிந்து கீழே விழுந்து நொறுங்கியது. இந்நிலையில் விமானம் விழுவதற்கு முன் இரு பெண் விமானிகளும் பாராசூட் மூலம் கீழே குதித்தனர். விபத்தில் காயமடைந்த இவர்களை மீட்டு சித்திப்பேட்டை அரசு மருத்துவமனைக்கு அனுப்பி வைத்தனர். பிறகு அங்கிருந்து ஒருவரை மேல் சிகிச்சைக்காக ஹைதராபாத் அரசு மருத்துவமனைக்கு அனுப்பி வைத்தனர். விபத்தை தொடர்ந்து விமானப்படை அதிகாரிகள் சம்பவ இடத்திற்கு சென்று ஆய்வு மேற்கொண்டு வருகின்றனர்.