பெங்களூருவில் இன்று கூடுகிறது எதிர்க்கட்சிகளின் 2ஆவது ஆலோசனைக் கூட்டம்

பெங்களூரு: மக்களவைத் தேர்தலில் பாஜகவுக்கு எதிராக வியூகம் அமைக்கும் எதிர்க்கட்சிகளின் 2 நாள் ஆலோசனைக் கூட்டம் பெங்களூருவில் இன்று தொடங்குகிறது. இதில் 24-க்கும் மேற்பட்ட தலைவர்கள் பங்கேற்கின்றனர்.

வரும் 2024-ம் ஆண்டு நடைபெறும் மக்களவை தேர்தலில், ஆளும் பாஜகவுக்கு எதிராக காங்கிரஸ், திரிணாமூல் காங்கிரஸ், திமுக உள்ளிட்ட எதிர்க்கட்சிகள் ஓரணியில் திரள திட்டமிட்டுள்ளன. இதன்படி எதிர்க்கட்சி தலைவர்களின் முதல் ஆலோசனை கூட்டம், பிஹார் முதல்வர் நிதிஷ்குமார் ஏற்பாட்டில், கடந்த ஜூன் 23-ம் தேதி பாட்னாவில் நடைபெற்றது. இதில் திமுக உள்ளிட்ட 17 கட்சிகளின் தலைவர்கள் பங்கேற்றனர். இதைத் தொடர்ந்து, எதிர்க்கட்சிகளின் 2-வது ஆலோசனை கூட்டம் பெங்களூருவில் இன்றும், நாளையும் நடைபெறுகிறது. இதற்கான ஏற்பாடுகளை கர்நாடக காங்கிரஸ் தலைவரும், துணை முதல்வருமான டி.கே.சிவகுமார் செய்து வருகிறார்.

இந்த கூட்டத்தில் பங்கேற்குமாறு 24-க்கும் மேற்பட்ட‌ எதிர்க்கட்சி தலைவர்களுக்கு க‌ாங்கிரஸ் தேசிய தலைவர் மல்லிகார்ஜுன கார்கே கடந்த வாரம் கடிதம் எழுதினார். இதைத் தொடர்ந்து, தமிழக முதல்வர் ஸ்டாலின், மேற்கு வங்க முதல்வர் மம்தா பானர்ஜி, பிஹார் முதல்வர் நிதிஷ்குமார், ராஷ்ட்ரிய ஜனதா தளம் கட்சியின் மூத்த‌ தலைவர் லாலு பிரசாத் யாதவ், தேசியவாத காங்கிரஸ் தலைவர் சரத் பவார் உள்ளிட்ட முக்கிய தலைவர்கள் இந்த கூட்டத்தில் பங்கேற்கின்றனர். காங்கிரஸ் சார்பில் அதன் தலைவர் மல்லிகார்ஜுன கார்கே, முன்னாள் தலைவர்கள் சோனியா காந்தி, ராகுல் காந்தி ஆகியோரும் கலந்துகொள்கின்றனர். உடல்நிலை பாதிப்பு காரணமாக, முதல்கூட்டத்தில் பங்கேற்காத சோனியாகாந்தி, இக்கூட்டத்தில் கலந்துகொள்வது உறுதியாகியுள்ளது.

பெங்களூருவில் உள்ள நட்சத்திர விடுதியில் 24-க்கும் மேற்பட்ட‌ கட்சிகளின் தலைவர்களுக்கு சோனியா காந்தி இன்று மாலை 6 மணிக்கு விருந்து அளிக்கிறார். இதைத் தொடர்ந்து, நாளை (18-ம் தேதி) காலை 11 மணிக்கு அனைத்து எதிர்க்கட்சிகளின் தலைவர்கள் பங்கேற்கும் ஆலோசனை கூட்டத்திலும் அவர் பங்கேற்கிறார். தமிழகத்தில் இருந்து மதிமுக பொதுச் செயலாளர் வைகோ, விசிக தலைவர் திருமாவளவன், மமக தலைவர் ஜவாஹிருல்லா, கொமதேக தலைவர் ஈஸ்வரன் மற்றும் இந்திய யூனியன் முஸ்லிம் லீக், பார்வர்டு பிளாக் கட்சி தலைவர்களும் பங்கேற்கின்றனர். இதுதவிர‌, சிவசேனா உத்தவ் தாக்கரே அணியின் மூத்த தலைவர்கள் உத்தவ் தாக்கரே, ஆதித்யதாக்கரே ஆகியோரும் பங்கேற்கின்றனர்.

டெல்லி அவசர சட்டத்தை எதிர்ப்போம் என காங்கிரஸ் கட்சி அறிவித்துள்ளதால், இக்கூட்டத்தில் ஆம் ஆத்மியும் பங்கேற்கிறது. அக்கட்சியின் தேசிய ஒருங்கிணைப்பாளரும் டெல்லி முதல்வருமான அர்விந்த் கேஜ்ரிவால் இதில் பங்கேற்பார் என தெரிகிறது. எதிர்க்கட்சிகளின் இந்த இரண்டு நாள் கூட்டத்தின் முதல்நாளான இன்று தேசியவாத காங்கிரஸ் தலைவர் சரத் பவார் பங்கேற்க மாட்டார் என தகவல் வெளியாகி உள்ளது. அதேநேரத்தில், சரத் பவாரும், அவரது மகள் சுப்ரியா சுலேவும் நாளை நடைபெற உள்ள கூட்டத்தில் பங்கேற்பார்கள் என அக்கட்சியின் செய்தித் தொடர்பாளர் மகேஷ் பரத் தபசி தெரிவித்துள்ளார்.

முன்னதாக, தேசியவாத காங்கிரஸ் கட்சியில் இருந்து பிரிந்து சென்று பாஜக கூட்டணியில் இணைந்த அஜித் பவார், தனது ஆதரவு எம்எல்ஏக்களுடன் சென்று நேற்று மும்பையில் சரத் பவாரை நேற்று சந்தித்தார். சந்திப்புக்குப் பின்னர் செய்தியாளர்களிடம் பேசிய அஜித் பவார் ஆதரவாளரான பிரபுல் படேல், "எங்கள் தலைவர், எங்கள் கடவுள் சரத் பவாரை சந்தித்தோம். அவரிடம் ஆசீர்வாதம் பெற வந்தோம். நாங்கள் சொல்வதை அவர் பொறுமையாகக் கேட்டுக்கொண்டார். பதில் எதுவும் தெரிவிக்கவில்லை. நாங்கள் அனைவரும் அவரை பெரிதாக மதிக்கிறோம். தேசியவாத காங்கிரஸ் கட்சி ஒன்றாக இருக்க வேண்டும் என்று வேண்டினோம்" என தெரிவித்திருந்தார்.

இந்நிலையில், இந்த கூட்டம் தொடர்பாக கர்நாடக அமைச்சரும், காங்கிரஸ் தலைவர் மல்லிகார்ஜூன கார்கேவின் மகனுமான பிரியங்க் கார்கே செய்தியாளர்களிடம் பேசினார். அப்போது, "நாங்கள் அனைவரும் ஒரு குறிப்பிட்ட சித்தாந்தத்துடன் ஒன்றிணைந்துள்ளோம். இந்தியாவையும், அரசியலமைப்புச் சட்டத்தையும் பாதுகாக்க நாங்கள் ஒன்றிணைந்துள்ளோம். எதிர்க்கட்சிகளின் ஒற்றுமையால் பதவி பறிபோய்விடும் என்று அவர்கள்(பாஜக) பயப்படுகிறார்கள். பாஜக மற்றும் பிரதமர் மோடியின் மேஜிக் எப்படி குறைகிறது என்பதை நீங்கள் பார்க்கலாம். மோடியின் புகழ் குறைந்துள்ளது, பாஜகவின் கொள்கைகள் பாதிப்பை எதிர்கொண்டு வருகிறது என்பதையே அவர்களின் அச்சம் காட்டுகிறது" என தெரிவித்தார்.

24-க்கும் மேற்பட்ட முக்கிய கட்சிகளின் தலைவர்கள் வருவதால், பெங்களூருவில் பலத்தபோலீஸ் பாதுகாப்பு போடப்பட்டுள்ளது. இக்கூட்டத்தில் பங்கேற்பதற்காக தமிழக முதல்வர் ஸ்டாலின் இன்று பெங்களூருவுக்கு புறப்பட்டு செல்கிறார். இன்று இரவு காங்கிரஸ் கட்சியின் மூத்த தலைவர் சோனியா காந்தி அளிக்கும் விருந்தில் பங்கேற்கும் அவர், நாளை நடைபெறும் கூட்டத்தில் பங்கேற்று ஆலோசனைகளை வழங்குகிறார். பின்னர், நாளை இரவு பெங்களூருவில் இருந்து புறப்பட்டு இரவு 9 மணிக்கு அவர் சென்னை திரும்புகிறார்.