233 - விளவங்கோடு

தமிழகத்தின் கடைக்கோடி மாவட்டமான கன்னியாகுமரியின் கடைக்கோடி தொகுதி இது. தமிழ்நாட்டின் தொகுதியானாலும், தொகுதிக்குள் மலையாள மொழி பேசும் மக்களும் கணிசமாக உள்ளனர். தேசிய கட்சிகள் கோலோச்சும் தொகுதிகளில் முக்கியமான தொகுதி இது. தொகுதிக்குள் எதிர்பார்ப்புகளும், பிரச்னைகளும் அடுக்கடுக்காய் உள்ளது. குழித்துறை நகராட்சி, கடையல், அருமனை, இடைக்கோடு, பளுகல், பாகோடு, உண்ணாமலைக்கடை, நல்லூர், களியக்காவிளை, பேரூராட்சிகளை உள்ளடக்கிய பகுதிகள் இத்தொகுதிக்குள் வருகின்றன.

2016 தேர்தலில் களம் காணும் வேட்பாளர்கள் விவரம்

தொகுதி மக்களின் பிரதான தொழில்கள் ரப்பர் சாகுபடி, தேனீ வளர்ப்புத் தொழில். இரண்டிலுமே இப்போது ஏகப்பட்ட பிரச்னைகள். மத்திய அரசு, வெளிநாடுகளில் இருந்து ரப்பரை அதிக அளவில் இறக்குமதி செய்வதனால் உள்ளூரில் ரப்பருக்கு உரிய விலை இல்லை. இதே போல் ரப்பர் சாகுபடியாளர்களின் பெரும்பாலான பட்டா நிலப்பரப்பு தனியார் காடுகள் பாதுகாப்பு சட்டத்தின் கீழ் கொண்டு வரப்பட்டுள்ளது. இச்சட்டத்தில் இருந்து விலக்கு அளிக்க வேண்டும் என்ற கோரிக்கை கிடப்பில் கிடக்கின்றது.இதே போல் ரப்பர் தொழிற்சாலை, ரப்பர் ஆராய்ச்சி மையக் கோரிக்கையும் நிறைவேற்றவில்லை.

இத்தொகுதிக்கு உட்பட்ட மார்த்தாண்டம் சுற்றுவட்டாரப் பகுதிகளில் முப்பதாயிரத்துக்கும் அதிகமான குடும்பத்தினர் தேனீ வளர்ப்புத் தொழிலில் ஈடுபட்டு வருகின்றனர். ஆனால் இங்கு தேனீக்களுக்கு நோய் ஏற்படும் பொழுது தீர்வு பெறுவதற்கு தேனீ ஆராய்ச்சி மையம் கூட இல்லை. இது தொடர்பாக தேனீ வளர்ப்போரின் கோரிக்கையும் எதிர்பார்ப்பாகவே நீள்கின்றது. தொகுதிக்குட்பட்ட பகுதிகளுக்கு நெய்யாறு இடதுகரை சானல் மூலம் தண்ணீர் வந்தது. காமராஜர் ஆட்சிக் காலத்தில் கேரளம், தமிழகத்தின் விளவங்கோடு வட்ட விவசாயிகள் பயன்படும் வகையில் புரிந்துணர்வு ஒப்பந்தம் போடப்பட்டு கட்டப்பட்டது இது. ஆனால் கடந்த 2004ம் ஆண்டு கேரள அரசு தன்னிச்சையாக நிறுத்த, தமிழக அரசு சார்பில் வழக்கு நடந்து கொண்டிருக்கின்றது. இப்பகுதியில் இருந்த சாகுபடி பரப்பும் கணிசமாக குறைந்து விட்டது. தொகுதிக்குள் நாடார் சமூக வாக்குகள் பெரும்பான்மையாக உள்ளது. அதற்கு அடுத்த இடத்தில் நாயர் சமூக வாக்குகள் உள்ளது. கடந்த 9 சட்டசபை தொகுதிகளில் மார்க்சிஸ்ட் கட்சி 5 முறையும், காங்கிரஸ் கட்சி 4 முறையும் வெற்றி பெற்றுள்ளது. கடந்த 2006ம் ஆண்டு மார்க்சிஸ்ட் சார்பில் போட்டியிட்ட ஜான் ஜோசப் வெற்றி பெற்றார். 2011ம் ஆண்டு காங்கிரஸ் வேட்பாளர் விஜயதரணி.

தொகுதியில் அடங்கியுள்ள பகுதிகள் :

விளவன்கோடு தாலுகா (பகுதி)

கீழமலை (ஆர்.எப்), மாங்கோடு, அருமனை, வெள்ளாம்கோடு, இடைக்கோடு, பளுகல், வெளவங்கோடு,பாகோடு, நட்டாலம் மற்றும் குன்னத்தூர் கிராமங்கள், கடையல் (பேரூராட்சி), அருமனை (பேரூராட்சி), இடைக்கோடு (பேரூராட்சி), பளுகல் (பேரூராட்சி), களியக்காவிளை (பேரூராட்சி), பாகோடு (பேரூராட்சி), குழித்துறை (நகராட்சி), உண்ணாமலைக்கடை (பேரூராட்சி) மற்றும் நல்லூர் (பேரூராட்சி).

29/04/2016-ன்படி வாக்காளர்கள் விவரம்:

ஆண்	1,18,876
பெண்	1,23,700
மூன்றாம் பாலினத்தவர்	19
மொத்த வாக்காளர்கள்	2,42,595

தொகுதி கடந்து வந்த தேர்தல்கள் ( 1977 - 2011 )

ஆண்டு	வெற்றி பெற்ற வேட்பாளர்	கட்சி	வாக்கு விழுக்காடு
2011	விஜய தரணி	இ.தே.கா	-
2006	G . ஜான் ஜோசப்	மார்க்சிய கம்யூனிச கட்சி	53.74
2001	D.மணி	மார்க்சிய கம்யூனிச கட்சி	56.75
1996	D.மணி	மார்க்சிய கம்யூனிச கட்சி	43.35
1991	M.சுந்தரதாஸ்	இ.தே.கா	48.86
1989	M.சுந்தரதாஸ்	இ.தே.கா	42.25
1984	M.சுந்தரதாஸ்	இ.தே.கா	57.49
1980	D.மணி	மார்க்சிய கம்யூனிச கட்சி	53.66
1977	D.ஞானசிகாமணி	மார்க்சிய கம்யூனிச கட்சி	48.85

2006 தேர்தல் ஒரு பார்வை

வரிசை எண்	வேட்பாளர்கள்	கட்சி	பதிவான வாக்குகள்
1	G.ஜான் ஜோசப்	சி.பி.ஐ	64532
2	F. பிரான்க்ளின்	அ.தி.மு.க	19458
3	பொன் விஜயா ராகவன்	என்.சி.பி	13434
4	L. தேவதாஸ்	பாஜக	12553
5	L. ஐடன் சோனி	தே.மு.தி.க	7309
6	E. ஜார்ஜ்	சுயேச்சை	1182
7	Y. ராஜதாசன்	பி.எஸ்.பி	532
8	S.வேல்குமார்	எ.பி.எச்.எம்	423
9	K. பிரபாகரன்	சுயேட்சை	334
10	V. ஞானமுதன்	சுயேட்சை	319
			120076

2011 - தேர்தல் ஒரு பார்வை

வரிசை எண்	வேட்பாளர்கள்	கட்சி	பதிவான வாக்குகள்
1	S.விஜய தரணி	காங்கிரஸ்	62898
2	R. லீமாரோஸ்	சி.பி.எம்	39109
3	R. ஜெயசீலன்	பாஜக	37763
4	T. வில்சன்	சுயேச்சை	1144
5	B.பிரமோத்	பி.எஸ்.பி	911
6	A. முருகேசன்	சுயேச்சை	687
7	K. வெங்கடேசன்	எ.பி.எச்.எம்	559
8	C.P. ராதாகிருஷ்ணன்	சுயேச்சை	498
9	V. ஞானமுதன்	சுயேச்சை	379
			143948